Bandièra01 1180x150: País Invisible

Actualitats

crotz-tolosaCreated with Sketch.Valadas Occitanas

Comença encui lo programa musical occitan sus RBE-TV

Ton-ton s’emetrà cada mèlcres a 21h sus lo canal 87 o sus rbe.it

Comença encui lo programa musical occitan sus la television italiana
Comença encui lo programa musical occitan sus la television italiana

Tèxte legit

Encui mèlcres 20 de setembre comença Ton-Ton, lo programa musical occitan que, en 6 episòdis, viatja entre lenga e musica per Occitània a la recèrca de qu’es qu’es istaa e de qu’es qu’es encui la trad-innovacion. En ondas al canal 87 RBE-TV (província de Turin, Coni e Asti) e en streaming sus rbe.it. Après, serè possible vèire tuchi li episòdis sus lo YouTube d’RBE, ràdio & TV.

Ton-Ton es un novèl programa musical occitan realizat gràcias ai finançaments de la Lei italiana 482/99  dins lo projècte “Occitan, lenga d’encui e de deman” emb lo coordinament de l’ofici cultural de l’Unione Montana Valle Stura, la curatèla de Stefano Degioanni, vòtz e frontman dai “Lou Seriol”, e la produccion d’RBE TV e Vibes Video.

Li 6 episòdis son istats enregistrats dins li espacis de l’òste Centro Fondo d’Aison, emb la participacion de la comunautat locala, envitaa a èsser una partia de la produccion dal programa coma públic “en sala”. L’staff de Vibes Video a trabalhat al montatge dal programa ensem ai trabalhaors de l’ofici lingüistic de l’Unione Montana Valle Stura que se son ocupats dal trabalh de traduccion en italian per lo sostitolatge de las devisaas en occitan.

Eira es temps de se butar comòde e se gòdre la vision dai 6 episòdis de Ton-Ton! Entre la realizacion d’una chançon musicala e una autra, li rescontres prepausarèn moments d’aprefondiment a l’entorn de la musica occitana d’encui, en particular as produccions mesclaas emb las contaminacions de diferentes genres musicals, que contarèn las estòrias de quarqu’uns dai grops pus renommats dai contèxtes musicals das Valadas Occitanas de Coni en li butant en relacion emb de formacions musicalas d’autri luòcs d’Occitània (França e Espanha), e donarèn decò d’espacis per musar sus l’usatge de la lenga e de la musica occitana coma aisina d’expression artistica.

 

 Vaicí li artistas de Ton-Ton:

  • 20/09: Chiara Cesano e Roby Avena – Duo Bottasso

  • 27/09: Sergio Berardo – Tatou Massilia Sound System

  • 04/10: Lhi Balòs – Goulamas’k

  • 11/10: Lou Seriol – Carles Belda – Gigi da Nissa Nux Vomica

  • 18/10: La Mesquia – Michel Bianco

  • 25/10: Teres Aoutes String Band – Mascarimirì

 

L’apontament es doncas per mèlcres, 21h, sus lo canal 87 o sus rbe.it!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article