Bandièra01 capçalera  1180x150: Novestivada

Actualitats

Francés a Marselha a denonciat l’indiferéncia davant lo drama dels migrants

Lo pontife clavèt dissabte al Faròt los Rescontres de la Mediterranèa

| Vatican News

Lo papa Francés clavèt dissabte passat al Faròt de Marselha los Rescontres de la Mediterranèa ont se parlèt de patz, migracion e integracion, joventut, educacion, teologia... Francés i denoncièt l’indiferéncia fàcia al drama dels migrants e faguèt una crida a l’umanitat e la civilizacion: “I a un crit de dolor qu’es lo mai fòrt de totes e que transforma la mare nostrum en mare mortuum, la Mediterranèa de brèç de la civilizacion en tombèl de la dignitat”.

Divendres, Francés aviá rendut omenatge als migrants mòrts en mar en exprimir son sosten a las organizacions umanitàrias que se consagran a ajudar los subrevivents dels naufragis.

 

De criticas contra lo modèl francés d’assimilacion

 

Pel cap catolic, la Ciutat Focenca es la capitala de l’integracion, mas “la mar de la coexisténcia umana es polluida per la precarietat que nafra quitament l’esplendida Marselha”, çò diguèt lo papa en precisar qu’“aquí ont i a precarietat i a criminalitat” e que la pauretat materiala, educativa, professionala, culturala e religiosa es un terren adobat per las màfias e pels trafecs illicits. A mai, lo papa tanben critiquèt lo modèl francés d’assimilacion:

 

“L’assimilacion, que ten pas compte de las diferéncias e demòra rigida dins sos pròpris paradigmas, permet a l’idèa de prevaler sus la realitat e compromet l’avenir, en aumentar las distàncias e en provocar la formacion de guèts, çò que crèa l’ostilitat e l’intolerància”.

 

Davant aquela situacion, l’archevesque de Marselha, Jean-Marc Aveline, qualifiquèt de “crime” l’enebicion de salvar de migrants de part de qualques institucions politicas. Considerèt qu’aquela interdiccion constituís una violacion flagranta del drech maritim internacional mai fondamental.

Lo papa Francés saludèt los que salvan de migrants en mar,  condemnèt “los gèstes d’asirança mascats jos un comportament moderat” e faguèt una crida a Euròpa per tractar aquela crisi umanitària d’un biais solidari e efectiu.

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Zerdski Montoliu
1.

Soi d'acordi amb el.
Mas "charity begins at home".
N'a recebut quantes de paures migrants lo ric Vatican?

  • 0
  • 1

Escriu un comentari sus aqueste article