Bandièra01 1180x150: País Invisible

Actualitats

Pel primièr còp un elegit independentista intra al Senat francés

Lo canac Robert Xowie, representant de l’FLNKS, a batut al segond torn la secretària d’estat encargada del ciutadanatge, Sonia Backès, a las senatorialas en Canaquia

Pel primièr còp un elegit independentista intra al Senat francés
Pel primièr còp un elegit independentista intra al Senat francés

Tèxte legit

Pel primièr còp un elegit independentista intra al Senat francés. S’agís del canac Robert Xowie, representant del Front de Liberacion Nacional Canac e Socialista (FLNKS). A mai, l’eleccion de Xowie arribava dissabte 24 de setembre, una data istorica pels canacs car fasiá just 170 ans que França aviá pres lo contraròtle de lor país.

Xowie a batut al segond torn la secretària d'estat encargada del ciutadanatge, Sonia Backès, candidata a las eleccions senatorialas per representar la Nòva Caledònia.

L'arribada dels independentistas canacs al Senat francés interven qualques jorns après una reünion a l'Elisi entre francistas e independentistas, dins l'espèr d'arribar a un acòrdi sus l'estatut de l'archipèla d'aicí la fin de l'annada en vista d'una revision constitucionala al començament de 2024.

Cal remembrar qu’al darrièr referendum sus l’independéncia lo “non” ganhèt amplament après que los independentistas aguèron cridat a non i participar pas. Una delegacion dels partits independentistas avián denonciat qualques jorns abans a l’Assemblada Generala de l’ÒNU a Nòva York la manca de legitimitat de la votacion pr’amor que se faguèt dins l’encastre d’un confinament per la covid-19. Aquel tresen referendum que deviá metre lo ponch final a l’Acòrdi de Nouméa a daissat lo conflicte sens solucion, mai que mai se prenèm en compte los faches que la majoritat independentista se refortiguèt entre lo primièr e lo segond referendum, e que la populacion canaca aumenta del temps qu’arriban de mens en mens d’europèus. Dempuèi las eleccions del 2 de febrièr de 2021, lo govèrn de Nòva Caledònia a una majoritat independentista.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitèas
1.

Aquò, los mèdias mai difusats o an amagat. Coma d'abituda.
An parlat pas que de la desfacha de la macronista sens dire qui èra lo que la mandèt pàisser.
E n'i encara per dire que nos podèm passar de Jornalet ?

  • 8
  • 1

Escriu un comentari sus aqueste article