Bandièra01 1180x150: País Invisible

Actualitats

Rugbi de XIII: mièja finala a Brutus pels Dragons

Ensag decisiu  de Julian Bosquet per la victòria catalana a Salford
Ensag decisiu  de Julian Bosquet per la victòria catalana a Salford | Dragons Catalans

Tèxte legit

Anem, reservatz vòstras plaças per la mièja finala de la Superliga que los Dragons jogaràn dins lor estadi lo divendres 6 d’octòbre. Los Sang e Aur respondeguèron a la recepcion plan “calorosa” de Salford ont s’impausèron dins lo darrièr quart d’ora: 19-8 per confirmar lor segonda plaça.

Wigan emportava lo bloquièr de primièr en ganhant dificilament a Leigh 10-6. Saint Helens bat Hull FC 30-12, marca insufisenta per raubar la segonda plaça als catalans.

Warrington assegura sa qualification en ganhant 20-8 a Huddersfield. Darrièra partida a l’imatge de la sason per l’ avantdarrièr Castleford batut a Leeds 46-0; fin del calvari per Wakefield batut sus sa pelena per Hull KR 12-56.

En barratge, divendres, Leigh (4n) reçauprà Hull KR (5n); dissabte, St Helens (3n) reçauprà Warrington (6n). En mièja finala, los catalans reçaupràn la formacion la melhora classada dels qualificats.

 

NRL: Penrith-Brisbane en finala

 

Las mièjas finalas del campionat australian vegèron las victòrias aisidas dels primadièrs del classament. Divendres, l’actual campion, Penrith, batiá Melbourne: 38-4. Dissabte, Brisbane anullava lo sòmi de finala dels neozelandeses: 42-12. La finala se jogarà aqueste dimenge 1r d’octòbre.

 

Victòria dels Blaus

 

L’esquipa de França, entraïnada pel Maxime Gressèque, s’impausèt largament a la formacion sèrba a Belgrad aqueste dimenge: 78-10.

A Pòrt Moresby, la seleccion australiana del president de la Federacion bat Papoa-Nòva Guinèa: 30-18.

 

Dos dèrbis per entamenar la sason

 

Aquesta dimenjada veirà la represa dels campionats d’Elèit 1 e d’Elèit 2.

Tre dissabte, las doas formacions catalanas , Dragonets e Pià, se rescontraràn sus la pelena de Sant Estève. Dimenge, al Molin, l’FC Lesinhan reçauprà lo campion limosenc.

Son tanben al programa d’aquesta primièra jornada:

  • Carcassona-Albi, dissabte, un còp que los sostens auràn acabat de manjar un buòu a l’ast.
  • Sent Gaudenç-Albi e Tolosa-Vilanòva se jogaràn dimenge.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article