Bandièra01 1180x150: País Invisible

Actualitats

Rugbi de XIII: los Dragons vòlon menar los Sants en infèrn!

L'aficha de la mièja finala
L'aficha de la mièja finala | Dragons Catalans

Tèxte legit

Lo grand rendètz-vos de la sason a Perpinhan se tendrà aqueste divendres 6 d’octòbre sul còp de 9 oras de la nuèit. En mièja finala de la Super League, los Dragons reçaupràn los campions actuals: Saint Helens, qu’a ganhat son barratge fàcia a Warrington: 16-8.

Los catalans, amb lo sosten de totes los afogats,comptan plan d’anar a Manchester lo 14 d’octòbre per la granda finala fàcia al venceire de la partida entre Wigan e Hull KR qu’a eliminat Leigh: 20-6.

Dissabte, a 6 oras del vèspre, a Ernèst Wallon, lo Tolosa Olimpic reçauprà, en mièja finala del Championship, Bradford. L’autra mièja finala opausarà dimenge Featherstone e Londres.

 

E de tres per Penrith!

 

En finala de l’NRL, las Pantèras de Penrith dominèron lo primièr temps. Marquèron un ensag transformat e una penalitat, mas Brisbane respondèt per un ensag al pè dels pals sus la còrna. Cort avantatge per Penrith: 8-6.

Lo dobertura de Brisbane, Ezram Mam, puntava tres ensages qu’Adam Reynolds transformava. Los Cavals Fòls menavan 24-8 a l’ora de jòc. Penrith baissava pas los braces, marcava un ensag, puèi dos e, a doas minutas de la fin, Nathan Cleary trapava lo trauc per cabussar dins l’en-but entre los pals; Penrith ganha 26-24 un tresen trofèu en seguida!

 

Represa del campionat

 

En Elèit 1, èra la represa del campionat. Dissabte, Carcassona marca lèu-lèu quatre ensages e bat Avinhon: 36-12. Los Dragonets empòrtan lo dèrbi catalan fàcia a Pià: 54-10.

Dimenge, lo campion Limós s’impausa al Molin fàcia a una formacion lesinhanesa rejovenida: 30-4. St Gaudenç suspren Albi 46-24 e Tolosa pren l’avantatge sus Vilanòva: 24-16.

Al programa de la dimenjada: Avinhon-Tolosa, Vilanòva-Lesinhan e Albi-Carcassona se jogaràn dissabte.

Dimenge de vèspre, se debanaràn Limós-Dragonets e Pià-St Gaudenç.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article