Bandièra01 capçalera  1180x150: Botiga

Actualitats

Se demane ar estat espanhòu qu’er occitan age eth madeish tractament qu’eth basco, eth catalan e eth galhèc

ÈRC a presentat ua proposicion de resolucion qu’exòrte ath govèrn qu’er occitan age era madeisha situacion qu’es autes lengües oficiaus der estat

Tèxte legit

Esquèrra Republicana de Catalonha presentèc agèr dimèrcles, 4 d’octobre, en Congrès des Deputats espanhòu, ua proposicion de resolucion qu’exòrte ath govèrn qu’er occitan age eth madeish tractament qu’eth basco, eth catalan e eth galhèc ena administracion generau der estat e que gaudisque des madeishi recorsi en sòn foment, promocion e respècte institucionau, e que se garantisque er exercici des drets lingüistics des sòns locutors. Era proposicion demane tanplan ua assignacion de hons estructuraus entar Institut d’Estudis Aranesi – Acadèmia Aranesa dera Lengua Occitana.

En expausat de motius, se soslinhe qu'era lengua occitana ei oficiau en Catalonha e qu’aquiu n’a era competéncia era administracion publica —Generalitat de Catalonha e Conselh Generau d’Aran— en çò que tanh ara sua preservacion e promocion. S’arrebrembe tanben ar estat qu’a ratificat era Carta Europèa des Lengües Regionaus o Minorizades, e qu’era situacion der occitan ena Val d’Aran ei inquietanta.

Un còp enregistrada era proposicion, eth burèu dera cramba parlamentària ne deu començar eth sòn examen entà que sigue avalorada pes servicis juridics e dempús debatuda en comission. Enfin, se debatrà en sesilha parlamentària. Se fin finau ei aprovada era preséncia der occitan aranés, se poderie trapar en toti es webs e formularis oficiaus dera administracion publica e quitament en documents oficiaus coma era carta d’identitat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article