Bandièra01 1180x150: País Invisible

Actualitats

Rugbi de XIII: Super-Sam manda los Dragons en finala!

D’aicí a qualques segondas, Sam Tomkins marcarà l’ensag de la victòria catalana
D’aicí a qualques segondas, Sam Tomkins marcarà l’ensag de la victòria catalana | Dragons catalans

Tèxte legit

Brutus afichava complet aqueste divendres de ser per la mièja finala de Superliga entre los Dragons e Saint Helens. Dotze mila espectators seguiguèron una partida que foguèt pas la de las grandas envoladas. Cada formacion ensajava d’impausar l’espròva de fòrça. Dins lo primièr temps, Adam Kheigran ensaquèt una penalitat pels catalans. Non, èra pas de fotbòl, mas la marca èra de 2-0 a la pausa!

A la 50a minuta, lo centre Hopoate preniá a contrapè la defensa catalana, marcava l’ensag que Percical transformava.

Doas penalitats de mai de Keighran tornavan menar los Sang e Aur a l’egalitat a sièis minutas de la còrna.

Los catalans s’installèron dins lo camp anglés. Sam Tomkins foguèt tròp cort sus la primièra temptativa de tombat. 79a: los angleses montan d’a fons sus Tomkins que pòt pas tustar lo tombat, un croquet, esfaça lo primièr anglés, un rafut e, per la darrièra accion de sa carrièra sus la pelena catalana, lo vaquí que cabussa entre los pals! Keighran transforma: 12-6 ,e los catalans pòdon prene lo camin del Teatre dels Sòmis (Old Trafford). Fa plaser de sortir d’un estadi ont onze mila personas an lo sorrire!

La finala se jogarà aqueste dissabte 14 (7 oras del ser, ora occitana): serà un afrontament entre los catalans e Wigan que s’impausèt largament dissabte fàcia a Hull KR: 42-12.

 

Lo TO jogarà la finala del Championship a domicili

 

Dissabte, lo Tolosa Olimpic recebiá dins son estadi los Taures de Bradford per la mièja finala del Championship. Los occitans marcan 4 ensages e menan 22-8 a la pausa per s’impausar fin finala 38.

Jogaràn la finala dimenge a domicili! E òc, a la suspresa de totes, Londres anèt aqueste dimenge s’impausar cò del superfavorit Featherstone: 36-26. Consequéncia: Tolosa, classat segond, reçauprà lo quatren, Londres (partida a 15h30, a Ernèst Wallon). La victòria, en mai del trofèu, significa la montada en Superliga.

 

Campionat: Tolosa e Limós en primadièrs

 

Se jogava la segonda jornada del campionat. Tolosa confirma sas intencions novèlas en ganhant del costat d’Avinhon: 24-16. Sus la còrna, a Vilanòva, Lesinhan marca un ensag e la transformacion de la victòria 24-22 passa del recanton: la sason s’anóncia tornarmai complicada pels Leopards.

Fàcia a Carcassona, Albi mena 12-0 a la pausa, los Canaris passan davant 14-12, mas Brad Wall serpenteja dins la defensa audenca, marca entre los pals un ensag complicat de la transformacion e d’una penalitat. Victòria albigesa: 20-14.

Dimenge, Limós ten a distància los Dragonets 30-14 e Pià ganha fàcia a St Gaudenç 30-24.

Al programa de la tresena jornada: Lesinhan-Avinhon, Carcassona-Pià e Tolosa-Albi se jogaràn dissabte 14; Limós-Vilanòva e Dragonets-St Gaudenç se disputaràn dimenge 15.

 

 

 

 

 


Aficha de la finala del Championship (Tolosa Olimpic)

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L’Alan
2.

Per que cadun-a

  • 0
  • 0
L’Alan Carcassona
1.

La Federacion a decidit Lo repòrt de total las partidas de la dimenjada per que ça d’un-al pòsque portar sosten als Dracs e al TO.

  • 0
  • 0

Escriu un comentari sus aqueste article