Seriá poguda èsser una dimenjada istorica, mas d’aquestes dissabte 14 e dimenge 15 d’octòbre nos demorarà qu’un panierat bèl de pentiments.

A Manchester, dissabte, los Dragons èran en finala de la Superliga fàcia a Wigan. Lo provèrbi ditz qu’una finala se jòga per èsser ganhada. Wigan teniá ja cinc trofèus de la Superliga alara que los Dragons disputavan lor segonda finala, aprèp la desfaita de 2021 fàcia a Saint Helens.

Doas fautas evitablas entraïnèron dos cartons jaunes pels Sang e Aur. Sul segond, Wigan quichèt per profeitar de son avantatge numeric e marquèt lo sol ensag de la partida que se revelèt decisiu: 2-2 a la pausa, 10-2 al tèrme. Los catalans prepausèron un jòc tròp estequit per poder contestar la superioritat anglesa. La formacion serà de tornar bastir, vist que uèit jogaires de l’efectiu actual siá arrèstan (coma Sam Tomkins), siá partisson cap a d’autres orizonts.

Dimenge, lo Tolosa Olimpic recebiá Londres dins l’estadi Ernèst Wallon. Los locals dominèron lo primièr temps e menavan 14-4 a la pausa. Solament, tenguèron pas la distància. Los vesitaires marquèron tres còps lo meteis ensag sus la meteissa ala per s’impausar 18-14. Tolosa agèt una darrièra palma de la partida, mas lo pilar Belmàs foguèt arrestat a quauques centimètres de la linha. Los angleses empòrtan lo trofèu e montan remplaçar Wakefield en Superliga.

Una sola partida de campionat s’es debanada, vist que la Federacion aviá prepausat un repòrt per que los tretzistas portèsson sosten als catalans e als tolosans. Limós a signat una tresena victòria fàcia a Vilanòva: 42-4.

Pel compte de la quatrena jornada, quatre partidas se jogaràn aqueste dissabte 21: Avinhon-Limós, St Gaudenç-Carcassona, Albi-Lesinhan, Vilanòva-Dragonets. Dimenge, Pià reçauprà Tolosa.

Al plan internacional, èra l’entamenada de la Copa del Pacific. Cò dels òmes, Austràlia domina Samoa: 38-12. Del costat femenin, Papoa bat las illas Cook: 46-10. Aqueste dimenge 22, a Saint Helens, se jogarà lo primièr tèst d’una seria de tres entre Anglatèrra e Tònga.