Bandièra01 1180x150: País Invisible

Actualitats

Sais: dimenjada de mobilizacions contra l’autoestrada A69

1600 gendarmas se son mobilizats per supervisar las protèstas e desmantelar una ZAD

| @lessoulevements

Tèxte legit

La dimenjada de mobilizacions contra lo projècte d'autoestrada A69 entre Tolosa e Castras s’es acabada amb lo violent deslotjament d’una ZAD.

Dissabte, a l’entorn de Sais, dins la campanha del País Castrés, de milièrs de personas manifestèron contra lo projècte d’autoestrada; mai de 10 500 manifestants segon los collectius ecologistas, mas 5000 segon lo gabinet del prefècte. Sus plaça, dins un endrech dich la Cremada, installèron una Zòna a Defendre (ZAD) que foguèt desmantelada dimenge amb l’intervencion de 1200 gendarmas.

Segon lo prefècte, ièr dimenge en fin de jornada i aviá sus la ZAD environ 150 personas dont 9 foguèron arrestadas. L’intervencion del milièr de gendarmas se tenguèt al mièg d’una presa de paraula dels manifestants. Las autoritats faguèron usatge de gases lacrimogèns, çò rapòrta France Bleu.

En tot, 1600 policièrs e gendarmas foguèron mobilizats durant tota la dimenjada per supervisar la mobilizacion contra l’A69. Lo prefècte a assegurat que las fòrças de l’òrdre avián fach un usatge estrictament necessari de la fòrça.

Lo conflicte a engendrat de tensions, amb d’acusacions de violéncia de part de las fòrças de l’òrdre e una crida a la solidaritat de grops opausats al projècte de l’autoestrada A69. Lo ministre de l’Interior a egalament evocadas las violéncias patidas per las fòrças de l’òrdre pendent l’evacuacion de la ZAD.

Las autoritats an anonciat que mantendrián lor preséncia sul sit per evitar tota reïntroduccion de manifestants, en adaptant lo dispositiu de seguretat en foncion dels desvolopaments.

 

 

 

 

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitèas
1.

Quanta violéncia! De veire los images pel fenestron, los violents semblan èsser los defendeires de nòstre mitan de vida, que lor daissan pas gaire la paraular per qu'expliquen lor accion. E la polícia de manejar los truca-colhons a tustas e a bustas amb l'ajuda de granadas lacrimogènas que borrolan l'image, çò que permet al primièr policièr de França de parlar d'ecoterrorisme.
E pensar que i a d'Occitans per benesir l'accion policièra ! Segur qu'aquel mond somia d'anar a fum de calhau pel riban A69 dins lor daquòs electric que lor balha una bona consciéncia ecologica. Los meteisses que jogaràn al loto ecologic sens se preocupar se i a pas qu'un 14 del cent qu'anirà per l'environament, lo demai essent per la "Française des jeux" e per l'Estat. Se creiràn modèrnes e lavats de tot pecat perque d'aquò se'n ditz "far la caritat". Modernitat rància, òc !
Amb de mond aital, acabarem que nos caldrà manjar de cement e de quitran. Nos anam regalar se sèm pas mòrts abans !

  • 7
  • 3

Escriu un comentari sus aqueste article