En campionat d’Elèit 1, aqueste dissabte, lo campion Limós coneguèt sa primièra desfaita de la sason cò dels Bisons d’Avinhon: 18-12.

A St Gaudenç, Carcassona fa la diferéncia dins lo primièr temps (24-0) per ganhar fin finala 36-16. Albi demòra mèstre a l’ostal fàcia a Lesinhan: 18-10. Los Dragonets van ganhar a Vilanòva: 24-12. Dimenge, Pià bat aisidament Tolosa: 28-0.

Aqueste dissabte 28, Lesinhan reçauprà Avinhon. Dimenge, a Carcassona, los espectators poiràn seguir tres partidas: la confrontacion en U19 entre Carcassona e Pià (12h45), puèi la partida internacionala femenina França-Galas (15h) e la partida d’Elèit 1: Carcassona-Pià (17h).

Rendètz-vos internacionals

Per la Copa del Pacific, aqueste dissabte, la Nòva Zelanda dominèt Samoa 50-0. Dimenge, la partida foguèt sarrada mas emportada 22-18 per Fiji fàcia a las illas Cook.

Dins la competicion femenina, las neozelandesas ganhan 28-10 fàcia a Tònga e, a Pòrt Moresby, las papós baton las illas Cook 28-20.

En Euròpa, los neerlandeses encadenan las victòrias 58-22 fàcia a Norvègia (30/09 ), 58-18 fàcia a Albania (7/10), 40-10 fàcia a Serbia (14-10 ) e, aqueste dissabte 21, empòrtan la Griffin Cup fàcia a Alemanha 44-18.

A Sydney, Malta bat Chile 30-22 e Polonha bat la Macedònia del Nòrd 40-8. De partidas jogadas per d’esportius emigrats en Austràlia.

Aqueste dimenge de vèspre, a St Helens, se jogava la primièra de las tres partidas entre Anglatèrra e Tònga. A la pausa, las doas formacions èran a egalitat 12-12. Puèi los angleses, mercé a dos ensages de l’alièr dels Dragons Johnstone, faguèron la diferéncia per ganhar 22-18. Las doas esquipas se tornaràn trapar aqueste dissabte a Huddersfield.