Los collegians de Maruèjols (Marjarida) e los liceans de Sanch Eli d’Apchièr (Aubrac) que fan d’occitan son a alestir un projècte de viatge a Malhòrca per descobrir la proximitat entre las lengas e culturas occitana e catalana.

Los estudiants concernits menan d’accions per finançar d’un biais mai autonòm possible lor viatge. Aital vendràn de chocolat per Nadal e d’autres produches sul mercat. A mai, organizaràn una corsa pedestra aqueste mes de decembre, que li dison “la corsa occitana”. Aquela recèrca de finançament passa tanben per una canhòta en linha, sus una plataforma de l’Educacion Nacionala francesa que se sona “La Trousse à Projets” (la Troça dels Projèctes).

Aquela canhòta serà en linha per una cinquantena de jorns, pas mai, ja que se deu virar lo mai largament possible. Es acompanhada d’un vidèo ont los escolans presentan lor projècte e las accions menadas en occitan.

Per collaborar amb la canhòta clicatz aicí.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…