Bandièra01 1180x150: País Invisible

Actualitats

Madrid: de susmautas ultraespanholistas davant lo sèti del Partit Socialista

Protèstan contra una eventuala amnestia dels independentistas catalans

| EFE

Tèxte legit

Madrid viu, dempuèi diluns passat, de susmautas intensas entre de manifestants espanholistas, mai que mai ultradrechistas, que protèstan davan lo sèti del Partit Socialista (PSÒE) contra una eventuala amnestia dels independentistas catalans amb qui lo PSÒE es a pachar per obténer los sostens necites a la formacion d’un novèl govèrn. Lo resultat de las eleccions legislativas del 23 de julhet passat foguèt fòrça estrech entre lo Partit Popular (PP) e lo Partit Socialista (PSÒE). Lo PP capitèt pas a constituir un govèrn per manca de supòrts, e ara lo PSÒE es obligat de negociar amb los independentistas catalans, que reclaman especialament una amnestia après lo secutament judiciari, las pesugas condemnacions e los exilis forçats.

La primièra linha de la protèsta èra ocupada per d'activistas ultradrechistas, neofranquistas e neonazis que cridavan d’eslogans coma “aquí los nazis, aquí los avètz” del temps que s’escridassava lo president catalan exiliat Carles Puigdemont. Tanben cridèron en favor d’una “Espanha crestiana, jamai musulmana” e d’insultes als migrants.

Lo primièr ministre espanhòl en foncions, Pedro Sánchez, a comentats los trebolitges, en criticant la drecha per aver pas condemnadas las atacas contra lo sèti del PSÒE e en se posicionant per la convivéncia e lo progrès social. De son latz, lo cap del PP, Alberto Núñez Feijóo, atribuís las protèstas al "malcontentament social" e a quitament criticat que la polícia aja agit contra los manifestants del meteis biais qu’o faguèt contra los independentistas catalans quand protestèron contra la senténcia de condemnacion dels presonièrs politics.

D’autre caire, The Financial Times a publicat un editorial qu’assegura que l’amnestia dels independentistas catalans es quicòm que cal far per evitar las “fracturas politicas” entre Catalonha e Espanha.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article