Bandièra01 1180x150: País Invisible

Actualitats

Los ucraïneses abandonan de mai en mai la lenga russa

Lo darrièr sondatge sociologic estima que lo 62% dels ciutadans an quitat de consumar de contenguts en rus e son passats a l’ucraïnés

Tèxte legit

Los ucraïneses abandonan la lenga russa. Segon un recent estudi sociologic, lo 62% dels ciutadans ucraïneses an quitat de consumar tota mena de contenguts en lenga russa e son passats a l’ucraïnés, çò rapòrta lo Diari de la Llengua. Los resultats de l'enquista mòstran tanben que lo 31% d’eles an reduch significativament lo consum de contenguts en lenga russa al profièch de la lenga pròpria d’Ucraïna, del temps que lo 7% an començat de legir en d’autras lengas estrangièras que la de Russia. Al total, lo 78% de la populacion d’Ucraïna a modificat sas preferéncias lingüisticas pendent lo conflicte.

Aquel cambiament en favor de l'ucraïnés se rebat tanben suls rets socials, ont la lenga oficiala del país a ganhat de terren. L'usatge de l'ucraïnés a d’efièch aumentat significativament sus de plataformas coma Facebook, X e Instagram. Per exemple, sus Instagram las publicacions ucraïnesas en lenga del país son passats del 65% al 90%  e sus Facebook del 15% al 70%.

Delà los cambiaments lingüistics, l’invasion russa a tanplan cambiat las costumas de consum de contenguts. Lo 59% dels ciutadans an aumentat lor interès per legir de nòvas e d’analisis de tematica politica, del temps que lo 14% son passats als documentaris e que lo 13% consuman mai de contenguts de divertiment.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article