Bandièra01 1180x150: Comuna de Tolosa

Actualitats

Rugbi XIII: contra Saint Helens: ganhar, pas mens!

Morgan Escarré, lo jove arrièr en cap d'aficha dels Dracs
Morgan Escarré, lo jove arrièr en cap d'aficha dels Dracs
La finala de la Cup opausarà a Wembley lo 24 d’agost Wigan e Hull FC. E òc, dissabte a Leigh, los Combatents de Wigan impausèron aisidament lor lei als Cavals fòls de Londres que vegèron pas lo lum: dotze ensags marcats per un planchòt final de 70-0. Puèi, dimenge, a Huddersfield, la partida foguèt mai sarrada e los venceires dels Dracs en quart, Hull FC, faguèron mentir los pronosticaires en ganhant 16-12 fàcia a Warrington. Finala Wigan-Hull FC lo dissabte 24 d’agost a Wembley.
 
Los Dracs, aprèp la malparada de Salford, an pas agut dreit a de vacanças, mas a una preparacion intensiva del rescontre contra St Helens programat aqueste dissabte 3 d’agost a 6 oras del vèspre a Brutus. Partida que jogaràn pas Julian Bosquet que n’acabarà amb una suspension de 3 partidas, nimai lo capitani Casty, privat de partida aprèp lo moment de trucs e de patacs de la fin de partida contra Salford. Henderson e Mounis an escapat a la suspension en plaidejant copable dins la mesura ont èran pas passats davant la Comission de disciplina dempuèi un an!
 
Al classament, los Dracs son cinquens amb 24 punts e Saint Helens seguís a un punt. Aquò explica la necessitat d’una victòria: la cinquena e la seisena plaças permeton de reçaupre pel primièr torn de las pelhòfas.
 
En Austràlia, lo campionat de l’NRL dintra dins las darrièras partidas de la fasa de classament. Son los Lapinons (Rabbitohs) que son primièrs, davant los Pols (Roosters) de Trent Robinson e los campions de la Tempèsta (Storm) de Melbourne. Lo diluns 5 d’agost, se farà en Rosselhon, sus l’estadi Brutus, un recampament dels Blaus dins l’encastre de la preparacion de la Copa del Monde de la tardor.
 
Un autre recampament es previst pel diluns 19 abans la designacion dels seleccionats.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article