CAPÇALERA OPLO

Actualitats

Un usatge excessiu del telefonet poiriá greujar la fertilitat

Un estudi demòstra que l’usatge regular del telefonet es plan ligat a una mendre qualitat de l’espèrma uman

Un usatge excessiu del telefonet poiriá greujar la fertilitat
Un usatge excessiu del telefonet poiriá greujar la fertilitat | pexels

L’usatge del telefon mobil causa de problèmas a la qualitat de l’espèrma. La causa ne poiriá èsser la radiacion electromagnetica dels telefonets. Es çò que se conclutz d’un estudi sus l’environament e la qualitat de vida que vòl trapar una causa a la pèrda de qualitat de l’espèrma uman aquestes darrièrs ans.

Aquestes darrièrs 50 ans, son estats realizats plusors estudis sus aquò, mas cap ne trobèt pas una explica clara. Ara, es estat estudiat pel primièr còp l’usatge dels telefons mobils e la resulta confirma qu’utilizar de manièra regulara lo telefonet es plan restacat amb una mendre produccion d’espèrma e tanplan a una baissa de sa qualitat.

L’estudi es estat realizat per una còla de cercaires de l’Universitat de Genèva, en Soïssa, e demòstra que l’usatge regular del telefonet es plan ligat a una mendre qualitat de l’espèrma uman. Totun, foguèt pas trobat cap de cambiament en la forma ni en lo movement de l’espèrma. L’estudi foguèt publicat dins lo numeric Fertility & Sterility.

Per classificar la qualitat de l’espèrma, los cercaires lo desseparèron segon las siás quantitat, mobilitat e morfologia. Segon l’Organizacion Mondiala de la Santat, un òme aurà de besonh de mai d’un an per aver un enfant s’a pas mai de 15 milions d’espermatozoïds per millilitre. Mas tanplan li costarà fòrça temps se n’a sonque 40 milions per millilitre.

Fòrça estudis an ja demostrat que la qualitat de l’espèrma uman s’es amendrida los darrièrs 50 ans: de 99 milions per millilitre a 47 milions, en mejana. Los scientifcs creson qu’aquò s’explica per mai d’una causa: los pesticidas, la radiacion, la dièta, l’alcòl, l’ànsia, lo tabac, etc.

 

L’importància del telefonet

 

E lo telefonet? L’estudi foguèt fach en 2019, mas sa resulta arriba solament ara. L’Universitat de Genèva estudièt l’espèrma de mai de 2886 òmes amb una edat d’entre 18 e 22 ans. Caliá saber tanben quin èra lor usatge del telefon mobil. Las donadas an confirmat que se pòt ligar l’usatge regular del telefonet a la qualitat de l’espèrma; avián plan mai d’espermatozoïds los òmes qu’emplegavan aquel aparelh sonque un còp cada setmana (56 milions/ml) e los que l’utilizavan mai de 20 còps de biais jornadièr avián un espèrma de qualitat fòrça bassa (44,5 milions/ml). I a doncas una diferéncia d’un 21% entre un grop e l’autre.

Los telefonets 2G provocavan mai de problèmas que los 4G pr’amor d’un mendre poder de radiacion d’aquestes. ‘‘D’autres estudis èran basats en fòrça pauques individús, çò diguèt Rita Rahban, de l’Universitat de Genèva. E los individús causits èran plan ideals pr’amor que l’espèrma aviá per sola origina de clinicas de fertilitat”.

Segon los cercaires, impòrta pas lo luòc ont demòra l’aparelh, que siá la bogeta del pantalon o un autre endrech, segon Rita Rahban. La resulta es la meteissa. Totun, l’estudi foguèt fach per mejan de questions personalas, e aquò es un limit per l’estudi. Ara serà dobèrt lo Burèu Federal Soís per l’Environament que vòl comparar mai de donadas environamentalas de l’emplec del telefonet amb la qualitat de l’espèrma. E o farà dirèctament a travèrs d’una aplicacion mobila. (Legissètz la seguida).

 

 

 


Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: Comuna de Tolosa

Comentaris

Franc Bardòu
1.

Mas qu'apèlan exactament "utilizar" lo telefonet ? Telefonar ? O chaupinar aqueste espion permanent (per fin publicitària intrusiva… o autras) de vòstras vidas privadas en navegar sus internet amb l'objècte a la man ? O lo simple fait d'o carregar amb vosautres, tot lo sant del jorn, a la pòcha, mas alucat ? O mai lo simple fait de se téner a costat de qualqu'un a mand de telefonar ? A s'aquò interven (negativament, e donc, nocivament) sus l'espermatogenèsi, sus qué mai encara pòt agir aquesta salopariá electronica qu'a totes e cadun assajan d'impausar, dins nòstres paures organismes vivents amodernits de fòrça ?

Reclami ieu — solet a cridar pel desèrt — lo dreit estricte e clar de n'aver pas un — un dreit que preni sense o aver mai, estant que mantas causas a l'ora d'ara necessitan unilateralament l'usatge nociu d'un telefonet mobile, a començar pel simple fait — indefugible — de dispausar d'un compte en banca.

  • 7
  • 1

Escriu un comentari sus aqueste article