Dins l’avion que lo menèt de Rio de Janeiro cap al Vatican, lo papa Francés diguèt dimenge passat a de jornalistas de tot lo Mond qu’el es pas degun per jutjar los omosexuals: “S’una persona es gai e cèrca lo Sénher e a de bona volontat, qual soi ieu per lo criticar?” Lo pontife diguèt que los gais deurián pas èsser marginalizats per la societat e mai se reconeis que lo catequisme de la Glèisa Catolica considèra coma un pecat los actes d’aquela orientacion sexuala.
 
Aquò foguèt sa responsa quand los jornalistas li demandèron perqué aviá pas dich son vejaire subre l’aprobacion d’una lei en Brasil que contempla lo maridatge entre personas del meteis sèxe. Critiquèt tanben l’existéncia d’un lobby gai al Vatican “non pas perque ajan aquela orientacion mas perque pas cap de lobby es bon”.
 
Los jornalistas s’estonèron de la bona predisposicion amb la quala lo papa respondèt a lors questions. Parlèt tanben del ròtle de las femnas dins la glèisa: neguèt que poguèsson venir capelanas mas diguèt qu’el èra pas partisan de restrénher lor ròtle dins la glèisa.