La federacion dels XIII a trapat una destinacion originala per l’esquipa nacionala (compausada de jogaires d’Elèit 1) per un desplaçament d’una setmana. Pel primièr còp, los Blaus jogaràn contra la formacion kenyana. Una jove formacion que nasquèt en 2013. L’an passat, foguèt batuda per Ghana (26-6) e batèt Cameron (16-0). A la debuta de novembre, perdèt dos còps fàcia a l’Africa del Sud: 12-56 e 2-82.

20 jogaires seràn del desplaçament amb doas partidas de jogar: lo dissabte 2 de decembre e lo dimars 5.

Autra partida internacionala: lo rescontre entre las formacions de XIII-cadieral de França e d’Anglatèrra aqueste dissabte 25 de vèspre al Palais dels Espòrts de Marselha.

Un dèrbi caça l’autre

Aqueste dissabte, Lesinhan recebiá Carcassona al Molin. Los vesitaires èran largament favorits, dominèron lo primièr temps. Concretizèron aquela dominacion per dos ensages abans de se faire contrar (8-6 a la pausa). Dins lo segond temps, los Canaris amb un ensag transformat e una penalitat fasián lo trauc. Lesinhan refusava de plegar, marcava un ensag e mancava una palma d’egalizacion sus la còrna. Victòria doncas de Carcassona: 16-10. Aqueste dissabte 25, a Domèc, los Canaris reçaupràn los autres vesins, los campions limosencs.

Dissabte tanben, Pià anèt ganhar 34-20 a Vilanòva, totjorn en cèrca d’una primièra victòria. Viatge tanben positiu per Albi a Avinhon: 24-12. A Sant Estève, los Dragonets s’impausèron fàcia a Tolosa 22-12.

Aqueste dimenge, a l’Agulha, los Grizzlies recebián los Orses de Sent Gaudenç e s’impausèron sens gaire de dificultats: 32-4.

Abonaments pels Dragons Catalans

Aqueste diluns 27 de novembre, los Dragons Catalans lançan lor campanha d’abonament per la sason 2024.

Fins al 1r de decembre, la campanha es reservada als abonats de 2023. Pels abonats novèls, caldrà esperar lo diluns 4 de decembre per soscriure. Un abonament balha dreit a 3 partidas de Superliga a gratis, de tarifas redusidas per las partidas amicalas e la Cup, de reduccions d’un 10 % a la botiga, una bilheta a mièg prètz per la Dimenjada Magica e un present dels Dragons. Una bona causa: dempuèi 6 ans, los Dragons practican la meteissa tarifa d’abonament!

Del costat de la Superliga, se botan ja en venda las bilhetas per la finala del dissabte 12 d’octòbre de 2024 a Old Trafford!