Bandièra01 1180x150: País Invisible

Actualitats

Rugbi de XIII: un punt en aur per clavar las partidas anar

Los jogaires del XIII de França al rescontre dels escolans kenyans
Los jogaires del XIII de França al rescontre dels escolans kenyans | FFR XIII

Tèxte legit

Per la segonda partida, dimars a Nairobi, los kenyans capitèron pas de seguir lo ritme dels Blaus. Aquò s’acabèt sus una plan larga victòria francesa: 108-4.

Mai que las resultas de las partidas, cal sotalinhar l’esperit de la formacion, qu’anèt véser de crocodrils e que rescontrèt d’escolans, e lo ròtle dins la volontat d’espandiment planetari del XIII.

De lor costat, Austràlia e NRL partisson a la conquista d’America. Un contracte ven d’èssser signat amb una cadena de television per la retransmission de las 2 partidas que se jogaràn a Las Vegas. 90 milions de fogals americans poirián èsser tocats!

 

Elèit 1: fin de las partidas anar

 

Aqueste dissabte 9 de decembre, se jogavan las partidas de la novena jornada. Dins la fanga, Albi finiguèt que faguèt plegar Pià: 16-0. Fàcia a Sent Gaudenç, Avinhon marca tres ensages dins lo primièr quart d’ora e sèrva l’avantatge per ganhar 24-14. Dins lo primièr temps, Limós e Tolosa fan jòc egal, mas los audencs fan cavalièr sol aprèp la pausa per ganhar 34-12.

A Lesinhan, fàcia als Dragonets, los locals menan 14-4 a la pausa mas marcaràn cap de punts apuèi: çò que permetrà als catalans, mai pragmatics, de véncer 19-14.

L’afar foguèt pas aisit pels primièrs, Carcassona, cò dels darrièrs, Vilanòva. Amb dos ensages d’alièrs, los Canaris menavan 10-0 a la pausa. Mercé a dos ensages transformats, los Leopards prenián l’avantatge 12-10. A 2 minutas del tèrme, Lucàs Albèrt passava la penalitat de l’egalizacion, abans d’ensacar lo tombat de la victòria al punt en aur aprèp doas minutas de prolongacion: 13-12.

Ara, las còlas benefícian d’un temps de pausa fins a la primièra dimenjada de genièr ont se jogaràn los ueitens de la Copa.

 

Elèit 2: Vilafranca sens desfaita e Selon sens victòria

 

En Elèit 2,

Vilafranca qu’a pas pogut jogar a Entraigas (arrestat municipal) demòra primièr amb 7 victòrias per 7 partidas jogadas.

Selon a pas ganhat una sola partida e vei Palau ganhar la siá primièra a Selon, justament: 30-16. Tonens monta en poténcia e bat Carpentràs 18-16, alara que Vilagalhenc-Argon domina l’Escura 30-14.

 

Atal, o saupretz…

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article