Bandièra01 1180x150: País Invisible

Actualitats

crotz-tolosaCreated with Sketch.LengadòcGavaldanAubrac

Sanch Eli d’Apchièr: los primièrs passes de la Corsa Occitana

L’objectiu d’aquela accion èra d’obténer un finançament per partir en sojorn pedagogic a Malhòrca

Sanch Eli d’Apchièr: los primièrs passes de la “Corsa Occitana”
Sanch Eli d’Apchièr: los primièrs passes de la “Corsa Occitana”

La primièra edicion de la Corsa Occitana se debanèt a Sanch Eli d’Apchièr (Aubrac) lo dimenge 3 de decembre de 2023 d’aprèp-miègjorn, precisament dins los bòsques de Camarelha. Una randolejada èra prepausada a partir de 14h. Puèi, a 14h30 per los mai esportius, una primièra corsa cronometrada de 5 quilomètres èra prepausada. Enfin, a 15h èra lo despart d’unes 8 quilomètres cronometrats tanben. A l’arribada, un estanquet amb una venda de begudas frescas o caudas e de crespèls esperava los 117 participants.

Fin finala, mai d’un dotzenat de correires foguèron recompensats per lor classament, mas totes los participants foguèron aplaudits e lausats per lor performança. Sens doblidar una mençon especiala per los mai pichons d’entre eles.

Aquela Corsa Occitana foguèt organizada per los estudians del licèu Teofil Rossèl e lor professora Barbara Rouquette. L’objectiu d’aquela accion èra d’obténer un finançament per partir en sojorn pedagogic a Malhòrca dins l’encastre de l’opcion occitan. Es tanben un viatge de ligason collègi-licèu, puèi que los liceans partiràn acompanhats dels escolans occitanistas del collègi de Maruèjols .

Una experiéncia fòrta per los joves organizaires d’aquel eveniment esportiu, que mòstra lor determinacion e met en relèu un sens de las responsabilitats.

Se pòt dire qu’aquela primièra edicion de la Corsa Occitana es una capitada completa, e l’esperit d’aquela manifestacion èra plan convivial. Tota la còla dels liceans e lor ensenhaire son plan resolguts per renovelar l’aventura l’an venent, benlèu a la prima.

 

 

 

Mathis Reversat,
escolan de Terminala del licèu Teofil Rossèl, Sanch Eli d’Apchièr (Aubrac)

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Delbac Mende
1.

Ne'n vaqui una bona novèla! Los joves que corron per far correr la lenga! Una primièra capitada que butarà a ne botar d'autras sus pè!

  • 19
  • 0

Escriu un comentari sus aqueste article