L’esportiu nimesenc Yannick Agnel a demostrat un còp de mai qu’es lo rei de la natacion. Dimars passat ganhèt son espròva preferida, los 200 mètres d’estil liure, amb una superioritat que daissèt estrambordat tot lo public que l’agachava al Campionat Mondial de Natacion de Barcelona.

Agnel arribèt al campionat entornejat de polemica, en suportant de criticas e de rumors. Èra plan trist. L’esportiu occitan solament voliá nadar los relèus perque se portava pas tan plan coma als Jòcs Olimpics de Londres, e perque se voliá pausar als campionats mondials de Barcelona. Sos rivals pensavan que gausava pas afrontar la revirada. En mai d’aquò, èra pas mai amb son entraïnaire de tota la vida e òm aviá quitament pensat qu’Agnel quitariá la natacion. Mas lo nimesenc demostrèt qu’es lo rei, mai que mai a l’esportiu estatsunidenc Ryan Lochte que voliá prene son revenge dels Jòcs Olimpics mas qu’a pas capitat davant la torpilha occitana.
 
Dimenge passat, França (l’esquipa qu’Agnel i participa) se proclamèt campiona mondiala en 4 x 100 m liures, en superant los Estats Units amb una finala incresabla. Lochte foguèt pas pro rapid e portèt pas lo sieu potencial. E en la finala d’aquel dimars, Agnel repetiguèt la valentiá de Londres e Lochte se manquèt tornarmai. La corsa veniá una repeticion del duèl entre los dos, mas Agnel o permetèt pas, en capitant los 200 mètres en una minuta e 44 segondas.