Doas protèstas simultanèas se tenguèron dissabte passat en Naut Daufinat. Mai d’una centena de personas s’acampèron al peatge autoestradièr de la Sauça (Gapencés) del temps qu’una cinquantena s’amassavan al giratòri dels Alps, a Briançon (Briançonés). Las protèstas seguissián la crida del collectiu NO-JO, çò rapòrta France Info e Le Dauphiné.

Los manifestants, que mostrèron de bandeiròlas e distribuiguèron de papierons als automobilistas, denóncian la manca de consulta populara e de consideracion dels opausants e los nauts còstes e impactes environamentals associats amb los Jòcs Olimpics.

La candidatura de las regions nomenadas Auvèrnhe-Ròse-Alps e Provença-Alps-Còsta d’Azur es encara en evaluacion, amb una decision finala prevista dins los meses venents.

Lo collectiu NO-JO tanben crida a se mobilizar dins d’autras vilas e organiza d’accions simbolicas endacòm mai. La resisténcia s’organiza mentre que los chepics pel clima e la manca de nèu afèctan ja los Alps occitans.