Lo dissabte 13 passat, Vilanòva signèt sa primièra victòria de la sason 25-10 fàcia al Tolosa Olimpic e li daissa la darrièra plaça al classament. A Avinhon, Carcassona altèrna moments fòrts e tempses febles, mas finís que ganha 46-28. Pas de dificultats per Albi per dominar St Gaudenç 50-6.

Dimenge, èra jorn de dèrbis. En tèrra catalana, Pià se remetiá de son pietadós ueiten de Copa e batiá los Dragonets 28-18. La suspresa bèla veniá de Limós ont una formacion lesinhanesa plan animada e collectiva fasiá virar canturla als campions de França per ganhar 30-10: los molinièrs son anats faire fècas dins la ciutat carnavalesca!

Al programa de la dimenjada

Dissabte, s’anóncia una gròssa partida a Domèc entre los primièrs dos del classament: Carcassona e Albi; de tarneses que son los sols a aver batut los Canaris aquesta sason! Limós se gandirà a Sant Estève, Lesinhan reçauprà Vilanòva. Partida importanta per la qualificacion entre St Gaudenç e Pià, alara que, dimenge, la cinquena partida farà acarar las formacions de coa de classament: Tolosa-Avinhon.

Elèit 2: los Lops son los mai fòrts

En Elèit 2, lo primadièr Vilafranca va batre Vilagalhenc-Argon 40-26 ; Illa s’impausa a Tonens 20-14; Palau bat l’Escura 38-18 e Carpentràs va ganhar lo dèrbi provençal sus la pelena d’Entraigas 20-18.

Los quarts de la Copa

Diluns passat, al sèti de la Federacion, se tirèron al sòrt los quarts de finala de la Copa Lòrd Derby (9 e 10 de març). Veiràn las oposicions: Carcassona/St Gaudenç; Dragonets/Limós; Lesinhan/Albi; Avinhon/Vilanòva.

Una partida de preparacion pels Dragons

Aquesta setmana (del 14 al 20), los Dragons an pres lo camin de Torremirona en territòri de la Generalitat per seguir un camp d’entraïnament e assegurar l’insercion dels nòuvenguts.

Lo dissabte 3 de febrièr de vèspre, a Brutus, per preparar lor sason de Superliga, los Dragons Catalans rescontraràn lo XIII del president, una seleccion de jogaires d’Elèit 1.

Aprèp la partida, se farà lo lançament de la sason al Palais dels Congrèsses de Perpinhan. Aprèp lo coctèl dinatòri, seguiràn discors del president Guasch, projeccion d’un filme sus la sason de 2023, presentacion de l’efectiu de 2024.

En mai de la finala de la Cup, la BBC retransmetrà un dotzenat de partidas de la competicion de Superliga, alara que Sky Sports retransmetrà totas las partidas.