Bandièra01 1180x150: País Invisible

Actualitats

Rugbi de XIII: mesfisatz-vos dels caissals dels Tigres!

Lo neozelandés Kevin Martin Proctor, ex-NRL e ex-Superliga, a jogat sa primièra partida jos las colors de Carcassona
Lo neozelandés Kevin Martin Proctor, ex-NRL e ex-Superliga, a jogat sa primièra partida jos las colors de Carcassona | Astreizix

A Domèc, aqueste dissabte 20 de genièr, en fin de vèspre se rescontravan los primièrs dos del classament: Carcassona e Albi. Los albigeses dobrissián la marca sus penalitat. Una longa passa al pè transversala de Gigòt trapava Pedrero qu’anava puntar l’ensag. 8-0 pels vesitaires aprèp 5 minutas de jòc. Los locals trapavan la bona carburacion: Herrero lançava lo pilar Boièr que marcava entre los pals.Lo talonaire Ludovic Artiga partissiá darrièr lo tengut e zigazaguejava dins la defensa advèrsa per marcar. Carcassona preniá l’avantatge 12-8 e marcava dos còps abans la pausa: Gambarro a la recepcion d’una candela de Lucàs Albèrt e Herrero en amassant una palma perduda per l’ataca tarnesa. A la pausa, los locals menavan 24-12. Dins lo segond temps, los vesitaires benefícian de doas patanadas localas a la recepcion de candelas per egalizar a 24-24. Los tarneses ajustan un ensag transformat e una penalitat per menar 32-30. Demòra un desenat de minutas de jòc. L’ensag d’Escaré, transformat per Herrero, rapròcha los Canaris a 2 punts dels Tigres. La darrièra ataca carcassonesa ven morir a un mètre de la linha blanca e sus la còrna. Albi ganha 32-30 e confirma sa victòria de la debuta de sason. Fa part atal de sas ambicions dins la competicion e de son ròtle de bèstia negra pels Canaris.

A Sant Estève, Limós se repren de sa prestacion pietadosa del dèrbi fàcia a Lesinhan, e bat los Dragonets 22-6 dins una partida ont cap de punt se marquèt pas dins lo segond temps! Lesinhan mestreja Vilanòva 32-24 e Pià se plaça per la 6a plaça qualificativa en ganhant 26-14 a Sent Gaudenç. Dimenge, Avinhon va ganhar a Tolosa: 24-10.

 

Grècia e Serbia sul camin del XIII de França femenin

 

Per anar a la Copa del Mond de 2026 en Austràlia, l’esquipa de França deu passar per de partidas eliminatòrias. Son dins un grop de 3 amb Grècia e Serbia. Las Blavas reçaupràn las grègas en abril (13 o 14) e aniràn en Serbia en junh (22 o 23). Se ganhan las doas partidas, seràn qualificadas per la competicion mondiala. S’acaban segondas, deuràn passar per un barratge contra las segondas de la pola de Galas, d’Irlanda e de la formacion victoriosa en abril entre Itàlia e Grècia abans una darrièra partida qualificativa contra una formacion d’un autre continent. Tot comptat e rebatut, val mai d’acabar primièras!

 

Los U17 del Pacific francofòn en Austràlia

 

A la debuta de febrièr, una seleccion de 27 jogaires U17 de Nòva Caledonia, Vanuatu, Wallis e Futuna e d’australians d’origina francesa farà una virada en Queensland per rescontrar tres formacions: los Cutters a Mackay lo dissabte 3; los Blackhawks a Townsville, lo dimars 6, e la formacion de Northern Pride a Cairns lo divendres 9. Pacific Tretze sòmia d’integrar las competicions juniors de Queensland.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article