Bandièra01 1180x150: País Invisible

Actualitats

Lo govèrn Attal ignòra l’occitan dins sos plans educatius

PQVNL denóncia que lo document de mesuras educativas presentat en decembre passat non pren pas en compte las lengas autoctònas autras que lo francés

Lo govèrn d’Attal ingòra l’occitan dins sos plans educatius
Lo govèrn d’Attal ingòra l’occitan dins sos plans educatius | Michel Euler / Associated Press

Tèxte legit

Lo govèrn de França a pas pres en compte las lengas autoctònas diferentas del francés dins son programa per melhorar lo nivèl educatiu de l’estat, çò denóncia lo collectiu Per Que Viscan Nòstras Lengas (PQVNL). Lo document de mesuras educativas que se presentèt lo 5 de decembre passat omet totas las lengas autras que lo francés.

Lo collectiu a enviat una letra al nòu primièr ministre, Gabriel Attal, qu’èra fins ara ministre de l’educacion, e a l’actuala titulara d’aquel pòrtafuèlha, Amélie Oudéa-Castera, en lor reprochant que non se siá pas consultada cap d’associacion d’ensenhaires o parents de las escòlas amb de seccions bilinguas o immersivas a l’ora d’elaborar las mesuras educativas presentadas en aquel document.

PQVNL remembra que s’es pas encara endraiada cap de mesura en aplicacion de la circulara mandada en decembre de 2021 que reconeis la legalitat de l’ensenhament immersiu de las lengas autoctònas. Aquela circula se difusèt per neutralizar la resolucion del Conselh Constitucional del mes de mai d’aquela annada qu’anullava los articles pertocant l'immersion lingüistica de la lei de proteccion patrimoniala e de promocion de las lengas dichas regionalas, coneguda coma Lei Molac, aprovada a l’Assemblada Nacionala.

PQVNL reclama que i aja de manuals escolars en totas las lengas minorizadas e que se meta en òbra los mejans umans e materials necessaris per desvolopar l’ensenhament d’aquelas lengas e en aquelas lengas. Lo collectiu critica tanben la reculada d’un drech lingüistic dins l’espròva de sciéncias del Diplòma Nacional del Brevet (DNB) pr’amor que las darrièras instruccions del Ministèri de l’Educacion dison que se traduirà pas los subjèctes de las espròvas en “lengas regionalas”. S’agís d’un pas endarrièr dins un encastre ont s’èra atench d'avançadas notablas après fòrça ans de lucha.

Per Que Viscan Nòstras Lengas es un collectiu que se fondèt en octòbre de 2019 a l’iniciativa de l’eurodeputat còrs François Alfonsi e del deputat breton Paul Molac. Es compausat d’estructuras associativas que representan la diversitat dels actors de las lengas dichas regionalas dins quasi totes los territòris concernits. Arremosa d’estructuras de l’ensenhament public e associatiu, e tanben del mitan cultural.

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ltrobat
3.

Merda, lo Attal e Na Oudéa-Castéra que se'n trufan beròi de las lengas minorizadas.
Diu vivant, qui aurait pu prédire (com at disè l'aute)?

  • 5
  • 0
Maria Àngel Lagarda Arièja
2.

Quuna suspresa !!!

  • 12
  • 2
A contra-subèrna
1.

Aguessèsse viscut pron longtemps per conèisser PQVNL que l'escriveira d'origina occitana Margarida Duras auria pas mancat de lor dire tristament : "Un barrage contre le Pacifique" , coneissètz ?

  • 7
  • 2

Escriu un comentari sus aqueste article