Se trapar en inferioritat numerica temporària pr’amor d’un carton jaune, o definitiva en rason d’un carton roge, pausa de problèmas defensius mas dins l’adversitat cèrtas esquipas capitan de se’n sortir en sublimant lor energia collectiva. N’aurem aqueste còp dos exemples.

Los Dragons se veson las pèiras per batre los Lops

Un dèrbi dobrissiá la sason de 2024 de Superliga: dijòus de ser, Hull KR s’impausèt sus la pelena d’Hull FC: 22-0.

Divendres, Londres descobriguèt lo nivèl de la competicion: desfaita a Saint Helens: 4-40; Huddersfield anèt ganhar a Leigh 16-8 e Leeds batèt Salford: 22-16.

Dissabte de ser, 9000 espectators emplenavan las tribunas de Brutus quand Dragons e Lops de Warrington dintrèron sus la pelena. Los catalans dominèron sens marcar e Arron Lindon, lo jove alièr de Warrington (17 ans), dobrissiá la marca. Jordan Abdull tustava una candela, la defensa anglesa arpatejava e lo dobertura sang e aur puntava l’ensag qu’Artús Morgue transformava. 6-4 pels Dragons a la pausa. A la represa: catastròfa. Aquesta sason, los arbitres seràn mai vigilants sul debanament dels tenguts e suls placatges nauts. McIlorum dintrava espatla la primièra dins un placatge: èra lo roge. Dirècte. Pendent 20 minutas, los catalans van téner còp en inferioritat numerica. Mai qu’aquò: Morgue plaça una acceleracion e va marcar l’ensag que transforma. Los catalans que se multiplican en defensa fan pagar lor indisciplina als angleses per 2 penalitats (14-4). Warrington desvolopa una accion bèla amb una pauma que corrís de man en man: 14-10. Los angleses acabaràn tanben la partida a 12 (carton jaune). Morgue ajusta una penalitat. Warrington enflamba la darrièra accion, mas, de badas… Victòria catalana: 16-10.

Wigan domina Castleford: 32-4.

Dijòus, Hull KR reçauprà Leeds. Divendres, los Dragons jogaràn a Londres e Warrington reçauprà Hull FC. Dissabte, Saint Helens se gandirà a Huddersfield. Dimenge de vèspre, se jogarà Salford-Castleford.

Supremacia mondiala

Dissabte 24 de ser, es dins un estadi comol que Wigan e Penrith se disputaràn la Copa del Mond dels clubs. A priòri, los europèus an l’avantatge del terren e d’una competicion ja entamenada.

Dèrbi de granda intensitat a Limós

Aqueste dimenge, a l’Agulha a Limós, èra jorn de dèrbi: los locals recebián Carcassona. Amb doas penalitats, los Roge e Negre prenián l’avantage 4-0, mas Carcassona alinhava tres ensages per menar 16-4. Limós replicava, Carcassona ajustava un ensag mas podiá pas empachar los locals de tornar a 16-20 a la pausa. Tre la represa, Limós preniá l’avantatge 22-20. A la 55a, una carga de Drodrolagi es bonificada per Lucàs Albèrt: 26-22 per Carcassona que se va trapar en inferioritat numerica aprèp un carton roge per placatge naut. Aquò va pas empachar los Canaris d’ajustar una penalitat e dos ensages transformats per véncer 40-22!

Quatre partidas de la quatorzena jornada se jogaràn dissabte: Avinhon-Vilanòva, Dragonets-Carcassona, Albi-Limós e lo dèrbi St Gaudenç-Tolosa. Dimenge, Lesinhan anirà afrontar Pià.

Los aborigèns mai fòrts

Divendres a Townsville, la seleccion dels aborigèns d’Austràlia s’impausèt fàcia als maòris de Nòva Zelanda: 22-14. Dins lo rescontre femenin, larga victòria de la seleccion aborigèna 26-4.

En Euròpa, de notar la victòria de Serbia en Montenegro 52-34 . En Austràlia, una seleccion macedoniana bat los representants de Malta: 22-18.