Bandièra01 1180x150: Comuna de Tolosa

Actualitats

Un ancessor de 4500 ans

Lo 40 % dels dels portugueses, espanhòls, catalans e bascos an un ancessor comun que visquèt fa aperaquí 4500 ans

Aquela varianta genetica es presenta en mai del 70% dels òmes del Bascoat. Pasmens, de l’autre costat dels Pirenèus, en Occitània, aquela varianta sonque es presenta en lo 10% dels òmes
Aquela varianta genetica es presenta en mai del 70% dels òmes del Bascoat. Pasmens, de l’autre costat dels Pirenèus, en Occitània, aquela varianta sonque es presenta en lo 10% dels òmes | eupedia.com

Un estudi recent a confirmat que lo 40 % dels abitants de la peninsula Iberica, doncas dels portugueses, espanhòls, catalans e bascos, an un ancessor comun que visquèt fa aperaquí 4500 ans.  L’estudi analisèt l’ADN de gaireben 3000 personas de la peninsula mas tanben d’Occitània.

Segon aquel estudi, l’analisi del cromosòma Y, ajudèt plan a conéisser l’origina dels estatjants peninsulars iberics, lo luòc ont demoravan e tanben balhèt un pauc de lutz sus l’evolucion demografica de la peninsula. Per o poder far, los cercaires estudièron tanplan la varianta R1b-DF27 d’aquel cromosòma, plan comun a la peninsula Iberica.

La còla de cercaires que realizèt aquel estudi es de l’Institut de Biologia Evolutiva de l’Universitat Pompeu Fabra e de l’Universitat del Bascoat. Los scientifics, aital, an pogut confirmar qu’aquela varianta genetica es presenta en mai del 40 % de la populacion totala de tota la peninsula Iberica. En mai d’aquò, tanben es present en mai del 70% dels òmes del Bascoat. Pasmens, de l’autre costat dels Pirenèus, en Occitània, aquela varianta sonque es presenta en lo 10% dels òmes.

 

Una istòria demografica en èrsas

 

Segon Francesc Calafell, que dirigiguèt l’estudi e qu’es cercaire a l’Universitat Pompeu Fabra, " l’istòria evolutiva peninsulara semblariá de seguir divèrsas èrsas”. E aquestas èrsas serián la consequéncia de divèrsas descobèrtas tecnologicas o culturalas.

Per çò que tòca la varianta R1b-DF27, los cercaires afirman que la siá origina es datada d’entre 4000 e 4500 ans e que se poiriá situar geograficament dins lo nòrd-èst peninsular. "Se pòt trobar sovent al Bascoat, mas las diversitat e intensitat son pus bassas en los òmes bascos qu’en d’autras populacions peninsularas. E aquò confirmariá que lo Bascoat foguèt pas la region geografica primièra”, çò diguèt Calafell.

Pels cercaires, “l’origina en Iberia seriá doncas locala, “pr’amor que i a mai de diversitat e d’ancianetat en d’autras regions”. Aquò confirmariá lo movement de populacion de l’Orient Pròche vèrs l’occident europèu pendent l’Edat del Bronze, quand arribèron las populacions non indoeuropèas sus la còsta mediterranèa e tanben a l’interior e oèst peninsular, ont i aviá de populacions cèltas.

Aquela meteissa varianta genetica pòt èsser trapada en fins al 40% dels òmes de Colómbia, lo 36 % dels òmes en Puerto Rico, lo 10% dels òmes en Mexic e fins al 8% de le populacion masculina peruviana. Es una varianta que demesís en de populacions amb una preséncia indigèna americana plan nauta. (Legissètz la seguida).

 

 

 


Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article