Bandièra01 1180x150: Comuna de Tolosa

Actualitats

PoliticaSocietat
crotz-tolosaCreated with Sketch.LengadòcLengadòc BasLodevés

Un ortalièr arrestat per son sosten a Palestina

L’incident, viscut al mercat de Clarmont d’Erau, a desvelhats de debats sus la libertat d’expression e los reglaments locals en matéria de politica

Un ortalièr arrestat per son sosten a Palestina
Un ortalièr arrestat per son sosten a Palestina

Tèxte legit

Mariano Pusceddu, un ortalièr engatjat per la causa Palestina, es estat interpelat davant son taulièr del mercat de Clarmont d’Erau (Lodevés) per aver arborats de vestits qu’afichavan l’eslogan “Free Palestine”, çò rapòrta Midi Libre. L’arrestacion aguèt luòc lo jorn de la vesita del prefècte d’Erau, sus un mercat ja somés a un reglament estricte en matèria de manifestacions politicas.

Pusceddu, una cara plan coneguda del mercat de Clarmont, s’es dempuèi longtemps exprimit dobèrtament sus sas conviccions al benefici de Palestina en afichant de camisetas e d’eslogans sus son taulièr de legumaire. Pasmens, aqueste còp, los policièrs municipals exigiguèron que tornèsse cargar sas revendicacions en favor de Palestina dintre son camion, confòrmament a las règlas del mercat.

L’incident escalèt lèu quand de clients prenguèron la defensa de l’ortalièr, argumentant que se tractava de libertat d’expression. Los escambis agitats finiguèron que faguèron intervenir la gendarmariá. Segon de testimoniatges, las fòrças de l’òrdre demandèron a Mariano Pusceddu de retirar sos vestits e camisetas penjats a son taulièr, çò que refusèt de far. Un òme qu’auriá temptat d’aparar lo legumaire foguèt embarcat pels gendarmas. Lo cònsol màger de Clarmont d’Erau, Gérard Bessière, a confirmat l’incident, soslinhant que la demanda de retirar los camisòts èra destinada a evitar tota politizacion del mercat.

L’incident a pres una dimension particulara a causa de la vesita prevista del prefècte d’Erau, François-Xavier Lauch, e d’una delegacion d’elegits locals. Lo trajècte de la vesita foguèt quitament modificat per evitar lo taulièr de Mariano.

Aquel afar a suscitada una èrsa de sosten a Pusceddu, amb de manifestacions organizadas pel collectiu Semeneires de Lodevés & Larzac. Lo legumaire risca d’ara enlà l’expulsion del mercat se retira pas las camisetas en question, una decision que refusa categoricament.

La situacion de Mariano Pusceddu soslèva de questions sus la libertat d’expression e l’equilibri entre las opinions politicas e los reglaments locals, suscitant un debat sus la plaça de l’activisme politic suls mercats locals. En mai d’aquò, l’incident s’inscriu dins un contèxt mai larg de persecucions e de censuras dels partisans de Palestina, coma la destitucion d’Émilie Gomis als Jòcs Olimpics o lo secutament patit per la jurista francopalestiniana Rima Hassan.

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article