Aqueste dissabte, a Wigan, la Copa del monde dels clubs èra en jòc dins l’oposicion del club local amb los campions de l’NRL, Penrith. Los australians ataquèron plan la partida per menar 12-10 a la pausa. Un sol ensag foguèt marcat pels angleses dins lo segond temps. La partida s’acabèt sus un jogaire australian placat sus la linha anglesa; lo vidèo refusèt l’ensag e lo trofèu demòra en Anglatèrra (16-12) amb la segonda desfaita de Penrith dins aquela quista.

Los australians a Las Vegas

Aqueste dimenge 3 de març, es sul terren ont se ven de jogar la finala del Super Bowl que quatre formacions australianas dobriràn la sason del campionat NRL amb las partidas Manly-Lapinons e Polets-Bròncos.

Amb l’escart orari, en Occitània, poiretz seguir las partidas en dirècte dimenge a 3h e mièja del matin la primièra e a 5h e mièja la segonda sus BeIn Sports !

Los Dragons domdan los Cavals Fòls

Primièr desplaçament dels Dragons de la sason aqueste divendres de ser. Agèron cap de problèmas fàcia als nòuvenguts de Londres: tres ensages dins lo primièr temps, tres de mai dins lo segond per una victòria 34-0. E un novèl desplaçament aqueste dissabte per anar afrontar Leeds.

Dijòus, Leeds perdèt cò d’Hull KR: 12-22. Divendres, Warrington ganhava aisidament fàcia a Hull FC: 32-10. Dissabte, St Helens s’impausèt a Huddersfield 28-0. Dimenge, partida sarrada e victòria 26-22 de Salford fàcia a Castleford.

Aqueste divendres 1r de març, tres partidas son programadas: St Helens/Leigh, Wigan/Huddersfield e Warrington/Castleford. Dissabte, Salford reçauprà Hull KR e, dimenge, Hull FC e Londres voldràn signar lor primièra victòria de la sason.

Elèit 1: la corsa en tèsta per Carcassona e Albi

Menats a la pausa 12-8, puèi 18-8, los Canaris trapèron lo biais de marcar tres ensages per ganhar 26-20 a Sant Estève. Dins una partida ont se marquèt un sol ensag, Albi batèt Limós: 4-0. Tolosa anava ganhar a Sent Gaudenç lo dèrbi de Nauta Garona: 40-28. Dimenge, aprèp una primièra part equilibrada, Pià s’envolava fàcia a Lesinhan: 26-0.

Pel compte d’aquesta 15a jornada, quatre partidas se jogaràn dissabte: Limós-Pià, Vilanòva-Albi, Lesinhan-St Gaudenç e Carcassona-Tolosa.

En Elèit 2, de notar la victòria jos una pluèja bèla de l’Escura fàcia a Illa: 12-8, alara que Vilafranca perseguís sa culhida de victòrias: 34-10 fàcia a Carpentràs .