Tèxte legit
Aquesta dimenjada, se jogavan los quarts de finala de la Copa Lòrd Derby. Los Canaris, deteneires del trofèu, marquèron 9 ensages fàcia a Sent Gaudenç, l’alièr Georgy Gambaro anèt quatre còps darrièr la linha per una victòria 48-0. Al Molin, Lesinhan foguèt menat 8-0; tornèt a egalitat a una minuta de la fin abans de passar lo tombat de la victòria tre la debuta de la prolongacion per se desfaire d’Albi 9-8.
Avinhon faguèt una melhora fin de partida que Vilanòva, e se qualifiquèt sus la marca de 16 a 8.
Dimenge, a Sant Estève, los catalans menavan long de la partida e eliminavan Limós 26-20.
Las mièjas finalas se debanaràn lo dimenge 7 d’abril dins un estadi de Marselha (estadi Pierre Delort).
Aquesta fin de setmana, la 16a jornada de campionat d’Elèit 1 se dobrirà dissabte 16 amb lo dèrbi Carcassona-Lesinhan. Albi reçauprà Avinhon. Al programa de dimenge 17: St Gaudenç/Limós, Pià/Vilanòva e Tolosa/Dragonets.
Superliga: los Dragons se reprenon
Dissabte passat, los Dragons recebián Hull FC, una setmana aprèp la desfaita a Leeds. Tre l’entamenada, MacMeeken traucava lo ridèu defensiu anglés e mandava Nikorima a l’ensag. Los catalans menavan 14-6 a la pausa, Hull marquèt un ensag mas los Sang e Aur n’ajustèron 2 per véncer 26-12. Atal, los catalans son los sols a aver ganhat a domicili dins aqueste 4n torn.
Dijòus, Warrington aviá ganhat cò d’Hull KR 22-20. Dissabte, Castleford preniá 50 punts d’Huddersfield (8-50); St Helens se fasiá susprene per Salford (20-24) e Leeds ganhava a Leigh (22-16). Dissabte, los Bròncos de Londres prenián lor estrilhada fàcia a Wigan (22-60).
Dissabte que ven, los Dragons recaupràn Castleford qu’a pas encara ganhat una sola partida.
NRL: los campions entamenan la sason per una desfaita
En Austràlia e Nòva Zelanda, èra la debuta de la competicion pels clubs qu’èran pas del viatge a Las Vegas.
Dijòus, Canberra anava batre Newcastle: 28-12.
Divendres, partida sarrada entre Melbourne e Penrith que s’acaba sus la desfaita dels vesitaires-campions: 8-0. Los neozelandeses s’inclinan sus lor pelena fàcia a Cronulla: 12-16.
Dissabte, Parramatta engolís los Dògols: 26-8. Una novèla sason s’anóncia complicada pels Titans que pèrdon a domicili fàcia a Sant Jòrdi: 4-28.
Dimenge, al Sun Corps de Brisbane, los Vaquièrs empòrtan lo dèrbi de Queensland fàcia als Dalfins 43-18.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari