Las resultas de la 16a jornada del campionat an confirmat que Carcassona e Albi èran ja qualificats per las mièjas finalas a Colomièrs a la debuta de mai.

Dissabte, Carcassona ganhèt lo dèrbi fàcia a Lesinhan (38-20) e Albi levèt sus la marca de 44-12 los darrièrs espèrs de qualificacion als avinhoneses.

Dimenge, Pià bat sens problèma Vilanòva: 48-22; a Sent Gaudenç, Limós fa la diferéncia dins lo segond temps (34-18); los Dragonets se van impausar sens dificultats a Tolosa (54-4).

Aqueste dimenge 24, lo calendièr del campionat se metrà a jorn amb lo rescontre Pià-Carcassona.

Divendres de ser, se tirèron las mièjas finalas de la Copa qu’opausaràn dimenge 7 d’abril a Marselha (estadi Delòrt) Carcassona e Dragonets (14h), Lesinhan e Avinhon (16h30).

Superliga: Los Tigres an pas d’urpas

Dissabte de ser, a Brutus, los Dragons recebián los Tigres de Castleford que se trapan en coa del classament sens cap de partida ganhada. Los catalans marquèron d’ensages e emportèron la victòria pro ben aisidament fasent la diferéncia dins lo segond temps: 16-6 a la pausa e 40-14 al final amb 7 ensages marcats per 7 jogaires diferents de las linhas arrièras.

Un còp de mai, los catalans son los sols a aver ganhat a domicili, vist que dijòus Wigan ganhava a Salford: 22-12; divendres, St Helens s’impausava a Leeds: 18-8; dissabte, Hull KR ganhava a Huddersfield: 24-14, Leigh passava un 54-4 a Hull FC; dimenge, Warrington èra plan mai fòrt que Londres: 58-4.

Plaça a la Cup

Aquesta setmana, plaça als ueitens de la Cup. Los Sang e Aur aniràn jogar contra un pensionari del Championship: Halifax. Dins quatre partidas s’acararàn de formacions de Superliga: Hull KR/Salford, Leeds/St Helens, Warrington/Londres e Huddersfield-Hull FC; Wigan reçauprà Sheffield. Leigh reçauprà Featherstone e Castleford anirà a Batley.

Championship: corta desfaita de Tolosa

Lo Championship repreniá amb un desplaçament de Tolosa cò de las Aglas de Sheffield. Los occitans perdèron la partida dins las darrièras minutas: 22-24.

La primièra partida a Ernèst Wallon es programada pel dissabte 6 d’abril amb la recepcion de Swinton.

NRL: los combatents neozelandeses folzejats

A Melbourne, los neozelandeses faguèron un brave segond mièg temps e pensavan batre enfin la Tempèsta que los aviá batuts 14 còps de seguida; deguèron plegar a la darrièra segonda sus un ensag marcat amb un saut espectacular al ras de la bandiereta. Desfaita: 26-30.

Dijòus, los Bròncos avián dominat los Lapinons 28-18. Divendres, los campions de Penrith dominèron Parramatta 25-18 e las Làmias batèron los Dògols 25-6.

Dissabte, los Vaquièrs batèron Newcastle d’un punt (21-20) , Canberra s’impausèt als Tigres de l’Òèst (32-12). Dimenge, Manly foguèt mai fòrt que los Polets 21-14 e los Dalfins neguèron los Dragons: 38-0.

Lo rendètz-vos de la joinesa tretzista

Aqueste dimenge 24 de març, a la Plana Mairevièlha a Carcassona, lo Challenge Grégoire remosarà fòrça escòlas de rugbi de XIII: unes 1200 mainatges son esperats (U7, U9, U11 e I-U13, dròlles e dròllas). Cal saupre preparar deman…