A Sydney, las partidas entre Polets (Roosters) e Lapinons (Rabbitohs) son totjorn un afrontament particular de l’NRL, levat qu’aqueste còp lo rescontre foguèt de sens unic amb una larga victòria dels Polets 48-6. Penrith bat los Bròncos, ont l’arrièr Rice Walsh es tocat al visatge dins un truc cap contra cap (34-12). Los neozelandeses baton Canberra 18-10. Los Dògols daissan los Titans a zèro: 32-0 . Largas victòrias dels Vaquièrs cò dels Dragons (46-24) e dels Tigres fàcia a las Làmias (32-6). Lo dimenge, partidas mai sarradas amb las victòrias de Parramatta fàcia a Manly (28-24) e de Newcastle fàcia a Melbourne (14-12).

Sols a tres victòrias, los Vaquièrs prenon lo cap del classament, alara qu’amb tres desfaitas los Lapinons se trapan darrièrs.

Carcassona e Albi ganhan al defòra

Lo campionat d’Elèit 1 se metiá a jorn. Dissabte, es a Entraigas qu’Avinhon recebiá Vilanòva; los Leopards menavan a la pausa, mas Avinhon foguèt plan melhor dins lo segond temps: victòria 28-13.

A Pià, los locals menavan 12-10 a la pausa, mas amb doas penalitats, tres ensages, doas transformacions e un tombat, Carcassona s’entornava amb la victòria: 31-12. A Limós, dins lo segond temps, contra lo vent, Albi resistiguèt als campions per marcar en tota fin de partida e véncer 14-6.

Aquesta dimenjada de Pascas, se jogaràn las partidas Albi-Dragonets, Avinhon-Pià, Lesinhan-Tolosa e Vilanòva-St Gaudenç.

Se Carcassona e Albi son ja en mièja finala, tot rèsta dobèrt entre los dos clubs audencs, Limós e Lesinhan, e las doas formacions catalanas (Pià e Dragonets) per acabar 3n e 4n e jogar lo barratge a domicili.

Cup: adieu, los Championships!

Las formacions de Superliga dintravan en Cup pel compte dels ueitens de finala. Las quatre formacions de Championship faguèron pas lo pes fàcia a elas: desfaita d’Halifax fàcia als Dragons catalans (4-40) que poguèron tornar en tèrra catalana via Montpelhièr dins la mesura ont l’aeropòrt de Perpinhan es tancat de nuèit. Castleford va batre Batley 28-14, Wigan domina Sheffield: 44-18, e Leigh elimina Featherstone 26-14.

Victòrias aisidas per Hull KR fàcia a Salford (40-0), Huddersfield fàcia a Hull FC (50-6) e Warrington fàcia a Londres (44-0). A Leeds, St Helens confirma sa victòria de la setmana precedenta en Superliga: 20-6.

Los quarts de finala se debanaràn los 13 e lo 14 d’abril, mièjas finalas cap al 18 de mai e finala a Wembley lo dissabte 8 de junh.

Aqueste divendres, retorn dels Dragons en Anglatèrra per afrontar Warrington que batèron 16-10 lo 17 de febrièr passat a Brutus.