Bandièra01 capçalera  1180x150: Novestivada

Actualitats

Aliot provòca amb una exposicion que vòl assimilar l’FLN argerian a l’Hamas

La dimenjada pasada, lo cònsol màger de Perpinhan inaugurèt, al mièg de protèstas, una exposicion organizada per una associacion nostalgica de l’Argeria francesa, ligada a l’extrèma drecha

Aliot provòca amb una exposicion que vòl assimilar lo FLN argerian a l’Hamas
Aliot provòca amb una exposicion que vòl assimilar lo FLN argerian a l’Hamas | Pablo Tupin-Noriega

Tèxte legit

Novèla provocacion del cònsol màger de Perpinhan, qu'inaugurèt dissabte l'exposicion "Seissanta ans apuèi, l'istòria se repetís: FLN e Hamas, meteisses metòdes, meteissa estrategia". L'exposicion, qu'a per mira d'equiparar lo movement independentista argerian amb l’Hamas, es organizada pel Cercle Algerianista, una organizacion de nostalgics de l'Argeria francesa qu’an de ligams evidents amb l'extrèma drecha.

L'exposicion se ten a la Sala de la Libertat de Perpinhan e mescla de fotografias d'atemptats pendent la guèrra d'independéncia argeriana amb d'imatges de las recentas atacas en Israèl e en Palestina. Dissabte, al moment de l'inauguracion, mai o mens cent personas manifestèron per protestar.

Aliot, que milita al partit ultradrechista RN, cultiva particularament de relacions amb de pènegres que quitèron Argeria après l'independéncia e contunhan de revendicar qu'aquel país fa partida de França. Representan actualament lo 5% de la populacion de Perpinhan.

Aliot provoquèt ja un primièr escàndol en aprovant un arrestat per batejar una plaça de la vila del nom de Pierre Sergent, mòrt dins la capitala nòrd-catalana en 1992, dirigent de l'Organizacion de l’Armada Secreta (OAS), un grop clandestin responsable de nombroses assassinats e atemptats en Argeria pendent la guerra d'independéncia.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Emanuèla Albi
2.

N'ai pas res d'estonant! Es un descendent de pènegres. Aquesta actitud es frecuenta. Son los degalhs del colonialisme, per tots los actors tocats : los Argerians e los pènegres. Y n'en pagam encara lo prètz, tots. Encara e tojorn.

  • 9
  • 1
Pitèas
1.

Aliot a entamenat una descatalanizacion ferotja de Perpinhan. Mèfi! qu'es un finòt. Coma se pòt veire amb aquesta exposicion, manipula l'istòria sens vergonha.
Amb lo pretèxt de l'ancian reiaume de Mallorca, que lo rei Jaume II aviá un palais a Perpinhan, a entamenat una relacion privilegiada amb l'extrema drecha espanholista que baileja las Illas Balearas (parla de far un bessonatge entre Palma e Perpinhan) per anar cotria contra lo catalan. Aquí francimandejan, aval espanholizan a tota zuerta.
Amb l'illusion de crear un pont entre las doas vilas, se tracha de copar Las Balearas de l'airal catalan e de restablir l'imaginari d'una frontièra entre catalans del nòd e catalans del sud.

  • 8
  • 1

Escriu un comentari sus aqueste article