E mai se França, Danemarc e la Nòva Zelanda venon d’aprovar lo maridatge omosexual, i a de païses, coma Russia, ont la repression ven de mai en mai dura. Lo jornal catalan Vilaweb prepausava aquesta setmana una analisi sus la situacion del collectiu gai dins tot lo Mond.

La setmana passada lo papa Francés diguèt a de jornalistas de tot lo Mond qu’el es pas degun per jutjar los omosexuals. Ongan, França, Danemarc e la Nòva Zelanda an aprovat la lei del maridatge omosexual; e los Estats Units anullèron una lei qu’empedissiá los estats de l’aprovar. En Anglatèrra e en Galas la lei intrarà en vigor l’estiu que ven. Ça que la, en Russia an aprovadas divèrsas leis fòrça duras contra los gais, en Africa i a de mai en mai de violéncia contra lo collectiu gai e i a sèt estats del Mond ont l’omosexualitat se punís amb la pena capitala. Quala es la situacion en las diferentas partidas del Mond?
 
Fa dotze ans los Païses Basses venián lo primièr estat qu’aprovava lo maridatge entre omosexuals. A l’ora d’ara, i a tretze estats de mai qu’o permeton. Sus aquesta mapa de la BBC los poiretz trobar. Son: Argentina, Belgica, Canadà, Danemarc, França, Islàndia, la Nòva Zelanda, Norvègia, Portugal, Sud-Africa, Espanha, Suècia e Uruguai.
 
En Euròpa l’omosexualitat es solament illegala dins la partida nòrd de Chipre, ocupada per Turquia. L’ONG Human Dignity Trust o a denonciat recentament a la Cort Europèa dels Dreches Umans.
 
Argentina foguèt lo primièr país de l’America Latina a legalizar; e qualques estats de Brasil e de Mexic aprovèron tanben los maridatges entre gais pauc après. Uruguai a legalizat lo maridatge e l’adopcion, e Colómbia aprovèt fa doas setmanas l’union civila entre personas del meteis sèxe.
 
Una causa semblabla se passa als Estats Units, ont la legalizacion depend de cada estat. En junh passat lo president Obama afirmèt publicament que sosteniá lo maridatge gai e una senténcia istorica de la Cort Suprèma reafirmèt que las unions omosexualas devon aver los meteisses dreches que las eterosexualas. Los jutges donèron rason a una femna de Nòva York que planhiá que li caliá pagar d’impòstes per l’ostal qu’aviá eiretat de sa femna.
 
Sus aquestes esquèmas del jornal The Guardian se pòt observar plan clarament quins dreches an los omosexuals dins cada estat.
 
 
L’omosexualitat es punida amb preson dins 78 estats del Mond e amb pena capitala dins 7
 
Coma o demòstra aquesta mapa, compresa dins lo sit web ligat al libre del catalan Marc Serena, Això no és africà!(Aquò es pas african!), l’omosexualitat es encara perseguida e punida amb preson dins setanta uèch estats del Mond, e dins sèt s’i aplica la pena capitala.
 
En 2006 Sud-Africa veniá lo primièr país african qu’aprovava los maridatges gais, mas dins la majoritat del continent african aquel collectiu es marginalizat e perseguit.
 
Serena explicava dins aquesta entrevista amb Vilaweb qu’en Africa “es aquí que i a las leis mai repressivas e diriái qu’a l’ora d’ara los gais, las lesbianas e los transexuals son las gents mai vulnerablas de tot lo continent”, que patisson una repression sistematica e, a l’encòp, passada jos silenci. Cal solament legir una citacion compresa dins un libre del president de Zimbabwe, Robert Mugabe: “Los omosexuals? Son piègers que los pòrcs e los cans. Diriái pas jamai al mieu can qu’es gai perque s’ofensariá”.
 
Al delà d’Africa, un autre cas grèu es Russia, ont quitament an aprovada recentament una lei qu’enebís quin tipe que siá de propaganda per las “relacions sexualas non tradicionalas”. En mai d’aquò los atacs contra de gais an aumentat de la part de grops neonazis.
 
En Asia, los dreches del collectiu progrèssan, mas plan doçament. En Vietnam se debanèt arunan per lo primièr còp una manifestacion per revendicar la fiertat gai. En Singapor i aguèt una protèsta amb mai de vint mila personas en junh passat.
 
Sus aquestas mapas, qu’a realizat l’associacion internacionala ILGA, se pòt veire amb prigondor l’estat de l’afar dins lo Mond entièr.