Las candèlas d’Abdull atudan los Lops

La Super-Liga a arrestat lo maraton de Pascas que vesiá las esquipas jogar a un ritme sostengut. Demòra lo rival round: la jornada dels derbís e de las partidas de tria.

Los Dragons èran en desplaçament a Warrington. Al moment de dintrar sus la pelena, Teò Fages, nafrat, daissèt sa plaça a la mesclanha a Ugo Tison, titularizat a-n-aquel pòste-clau pel primièr còp. Dins lo primièr quart d’ora, los catalans puntavan tres ensags per menar 18-0, mas los angleses marcavan dos còps abans la pausa per tornar a 18-12. Los catalans tornavan marcar dos ensags tre la represa per portar l’avantatge a 28-12, mas los angleses vòlon pas pèrdre, marcan dos ensags e se rapròchan a 24-28. A 2 minutas del tèrme, Abdull monta una candèla qu’es pas recuperada pels Lops e va puntar l’ensag el-meteis per una victòria catalana 32-24.Atal, los sang-e-aur son segonds al classament a nautor de Sant-Helens que reçaupràn aqueste dissabte 6 d’abril a Brutus (21h) betfred.

Dijòus, Leeds èra anat ganhar a Castleford (26-6). Divendres, KR ganhava lo derbí d’Hull fàcia al FC (34-10) e St-Helens batiá Wigan 12-4. Dissabte, Salfòrd dominava Leigh 32-2. Dimenge, London jòga lo ròtle de Petit Pocet fàcia als Gigants d’Huddersfield: desfaita: 6-26.

En Championship, Tolosa lança sa sason en l’emportant a Yòrk, aprèp aver fait la diferéncia dins lo primièr temps e maugrat dos cartons roges: 20-14. Primièra partida de la sason a Ernèst-Wallon aqueste dissabte 6 d’abril a 6 oras del ser amb la recepcion de Swinton.

Elèit: Una cordelada de punts

Dissabte, Vilanòva signava sa segonda victòria de la sason fàcia a Sent-Gaudenç: 37-36. Pià anava ganhar a la darrièra minuta a Avinhon 26-24; Lesinhan dominava Tolosa 44-8. Albi èra plan mai fòrt que los Dragonets 36-10.

Aqueste dimenge 7 d’abril, plaça a las mièja-finalas de la Copa de França que se tendràn, a l’estadi Delòrt a Marselha: Carcassona-Dragonets , a 14h; a 16h30: Lesinhan-Avinhon.

En Elèit-2, en l’emportant 24-12 a L’Escura, Vilagalhenc-Argon se ganha la segonda plaça e una mièja-finala a domicili. Ille (3en) e Carpentràs (4en) reçaupràn la partida de barratge.

NRL: L’ierarquia s’establís

Ne sèm a la quatrena jornada de competicion en Australia. I agèt doas victòrias al defòra: Penrith cò dels Polets 22-16 e los Dalfins cò dels Titans 30-14. Doas partidas s’acabèron sus la marca de 20-12 amb las victòrias de Sant-Jòrdi fàcia a Manly e dels neozelandeses fàcia a Newcastle . Los Lapinons capitan de batre los Dògols 20-16. Los Broncòs son plan mai fòrts que los Vaquièrs 38-12 e Cronulla bat Canberrà 36-22.

5 esquipas son en cap de classament: los Dalfins, Penrith, los Vaquièrs, Cronullà e Melborna. Los Titans an perdudas las 3 partidas qu’an jogadas .