Torna en Naut Carcin lo festenal Escambis per sa novena edicion. L’eveniment de cultura occitana de referéncia arriba ongan del 24 al 26 de mai amb un programa ric e cargat per totes los publics. Aurà luòc a Sant Seren, Banas e Sant Joan de la Ginèsta. Lo festenal Escambis es organizat per l’associacion Aquí l’Òc, e receb lo sosten de Jornalet.

Al programa i a divèrsas activitats culturalas dont de recampaments escolars occitanofòns, un concèrt, un mercat artisanal, d’exposicions fotograficas e d’autras causas. De soslinhar los concèrts de Serverina Bonnin e d’Eric Fraj amb Morgan Astruc. L’eveniment inclurà tanplan la remesa dels prèmis del concors d’escritura Pèire Brayac.

Aquel festenal en Carcin a la particularitat de s’adreiçar a un public larg: los que parlan occitan o non, los que son d’aicí o non... Tradicion e modernitat se conjugan per far descobrir e partejar nòstra cultura e nòstra lenga. Joves e mens joves se retròban dins de domenis tan variats coma lo cinèma, la musica, la dança, l’artisanat, la literatura, la poesia, l’istòria o lo conte.

Trobaretz lo programa e mai d’informacions sul sit web del festenal e sus Facebook.