Bandièra01 capçalera  1180x150: Botiga

Actualitats

Una revolucion per ajudar los paures en Africa: d’argent liquid sens condicions

L’organizacion GiveDirectly estima que caldriá près de 4 miliards de dolars per ne balhar 550 a cada adulte de Malawi que viu dins l’extrèma pauretat

| Moses Wilesi/GiveDirectly | The Washington Post

Tèxte legit

Un ciclòn estralhèt lo vilatge de Magret Frank fa dos ans, en destrusent las cabanas de fanga e del teulat de restolh, çò rapòrta The Washington Post. Sortiguèt sos quatre mainatges de lor lièch just abans que lo teulat s’afondrèsse, e las galinas e los vestits foguèron escobats pendent la nuèch. Ara, coma sos vesins, dormís entre las tempèstas dins un ostal nòu de bricas amb un teulat de fèrre. La constellacion d’ostals nòus es lo produch d’un programa pionièr, fruch de la mai granda donacion d’argent liquid en Africa per persona. Fa partida d’un projècte qu’a per mira de revolucionar la faiçon dont l’ajuda es balhada als paures: per una soma globala d’argent liquid sens condicions.

Lo programa es dirigit per GiveDirectly, una organizacion fondada per de diplomatas del MIT e d’Harvard que trabalhan amb d’economistas de primièr plan per identificar los mejans mai eficaces de reduire la pauretat. Aquel metòde es lo mai eficaç per balhar d’argent liquid, segon un estudi dels programas de GiveDirectly publicat en decembre, que comparava l’impacte de tres metòdes: de pichonas transfusions sus dotze ans, de pichonas transfusions sus dos ans o una soma globala.

Las consequéncias son importantas per de familhas coma la de Frank. Disiá que podiá quitament pas somiar d’un ostal de bricas. Alara, una proposicion fòla arribèt. Cada fogal, e mai lo de Frank, recebriá uèch cents dolars, una soma superiora a çò que ganhariá normalament en dos ans. Coma la màger part de sos vesins, a utilizat l’argent per bastir un ostal nòu.

Las tecnologias novèlas, coma l’argent mobil, rendon facil lo mandadís d’argent liquid dirèctament als mai paures del Mond. Malgrat que los programas d’espècias e de bons ganhen en popularitat, en passant de 6,6 miliards de dolars en 2020 a 10 miliards de dolars en 2022, representan pas encara que lo 5% de l’ajuda al desvolopament a l’escala mondiala e un pauc mens del 20% de l’ajuda umanitària.

Paul Niehaus, cofondador de GiveDirectly, afirma que los transferiments d’argent liquid pòdon pas remplaçar l’ajuda tradicionala per finançar d’estradas, de fòrças de polícia o d’espitals, mas ofrisson mai d’opcions als beneficiaris. Los paures coneisson generalament melhor lors besonhs qu’un burocrata o un cooperant, çò ditz, e las somas globalas ofrisson d’oportunitats que las presentan pas las allocacions. Las pichonas somas pòdon evitar la fam, çò ajusta, mas transforman pas una vida.

GiveDirectly estima que caldriá près de 4 miliards de dolars, còstes operacionals incluses, per balhar 550 dolars a cada adulte de Malawi que viu dins l’extrèma pauretat. Fins ara, lo programa a distribuit 50 milions de dolars a 160 000 adultes.

Lo ministre de las finanças de Malawi, Simplex Chithyola, declara que son govèrn trabalha en estrecha collaboracion amb GiveDirectly. “S’impausatz un servici especific, refusatz [a las familhas pauras] lo drech de causir”, çò ditz. “Lo desir es de far coma GiveDirectly, mas i a fòrça gents dins lo besonh”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Mens de 150 personas detenon mai de la meitat de la riquesa mondiala. Començan de nos conflar ab lo procèssus de culpabilizacion sistematica ! Se levatz la meitat de la requisa d'aqueles 150 mariòls parasitics neoliberals, del tant que son rics, non n'auràn la possibilitat psiquica de se'n mainar quitament !… E nos venon plorinejar per l'espatla quand arribam pas al final del mes, a l'ora d'ara. Simplament, manca una refòrma fiscala a l'escalon mondial, per superar enfin l'economia (coma o recomandava, per exemple, Abraham Lincoln, non vos parli del Che Guevarra) e la tornar al servici dels umans, mentre que per ara, a l'evidéncia, es lo contrari, amb los resultats desastroses que vesèm…

  • 1
  • 0

Escriu un comentari sus aqueste article