Bandièra01 capçalera  1180x150: Botiga

Actualitats

Rugbi de XIII: finala del Campionat Albi-Carcassona dimenge 26 de mai a Narbona

La mascòta e los sostens d’Albi XIII son prèstes per desfisar Carcassona XIII
La mascòta e los sostens d’Albi XIII son prèstes per desfisar Carcassona XIII | Jean-Emmanuel Chevry – Albi Rugby League

Tèxte legit

Aquesta dimenjada se jogavan las mièjas finalas del campionat d’Elèit 1.

Dissabte, Albí recebiá lo campion 2023: Limós. Lo primièr temps foguèt equilibrat e s’acabèt sus una egalitat 16-16. L’alièr local Pedrero se vesiá autrejar un carton roge que daissava sos esquipièrs en inferioritat numerica pel segond temps. Mas, aprèp una penalitat audenca, Gigòt interceptava un balon per marcar l’ensag. Albi èra davant e anava confirmar aquel avantatge amb una penalitat, un ensag transformat consecutiu a una 40/20 e un ensag dins las darrièras minutas. Victòria dels Tigres: 34-18, per un club qu’a pas jogat de finala del Campionat dempuèi 1977 ont avián batut… Carcassona !

Dimenge, a Domèc, Carcassona recebiá Pià. Los locals marcavan tres ensages dins lo primièr temps (14-0), puèi Pià pagava son indisciplina e daissava escapar los carcassoneses qu’ajustan cinc ensages, tres transformacions e una penalitat per ganhar 44-4. Mai que jamai se sòmia de doblat Copa-campionat al pè de Ciutat.

 

Dragons: venceires mas tristonets

 

Aprèp doas sevèras desfaitas a l’exterior, los Dragons recebián Leeds aqueste dissabte a Brutus. Se lor defensa se mostrèt de primièra e encaissèt pas cap de punt, se pòt plànher una animacion del jòc flaca. Se lo primièr ensag de Davies bonifiquèt una ataca classica, los autres tres ensages foguèron d’iniciativas personalas: una intercepcion e una corsa de 80 mètres per Tom Johnstone e, en tota fin de partida, un eslalòm d’Artús Morgue puèi un despart al ras del tengut del talonaire Da Costa per una victòria 26-0 que permet als Sang e Aur de demorar dins lo grop dels caps de la competicion amb Wigan, Saint Helens e Warrington. De Lops justament que seràn a Perpinhan lo 25 de mai. Caldrà auçar lo nivèl de jòc costat local per respondre a la formacion anglesa.

Aquesta dimenjada, plaça a las mièjas finalas de la Cup: Hull KR/Wigan, dissabte; Huddersfield/Warrington dimenge.

 

Las Làmias s’escapan

 

En cap d’aficha de la jornada de NRL, los primièrs dos se trapavan sus la pelena de Melbourne: la Tempèsta e las Làmias de Cronulla. Son los vesitaires que s’impausèron: 25-18, e que prenon sols la direccion de la competicion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article