Bandièra01 capçalera  1180x150: Botiga

Actualitats

Brasil: introspeccion après la catastròfa de Porto Alegre

“L’urbanizacion insostenibla, l’especulacion immobilièra e la desforestacion son las vertadièras causas d’aqueles desastres, non pas la pluèja”

| Mídia NINJA

Tèxte legit

Las autoritats de Brasil an començada una primièra analisi de çò que se poiriá èsser fach per prevenir o per atenuar los aigats qu’an provocat mai d’una centena de mòrts e dos milions de personas afectadas. La situacion es inevitablament dramatica. Las errors e las mancas de responsabilitats de part dels politics son evidentas pr’amor qu’aquestas darrièras annadas an reduches los fonzes dels sistèmas antiinondacions.

Evidentament, lo sistèma mai questionat es lo de Porto Alegre, que cediguèt fòrça lèu pr’amor que los motors avariats èran pas estats jamai remplaçats e que las pompas idraulicas èran rompudas. A mai, se faguèt de fendasclas sus las parets. Tot aquò demòstra la negligéncia sistematica de las autoritats municipalas e estatalas.

En mai de tot aquò, segon lo mèdia Poder360, la comuna comandèt de metre de sacas de sable per conténer l’aiga, una mesura que solament se deu far quand i a pas cap d’autra alternativa, e mai se descobriguèt que sonque 4 pompas sus 23 foncionavan coma cal.

Ara la societat civila demanda d’explicas sus l’impassibilitat de las autoritats, compte tengut del fach qu’aquestas darrièras annadas de climatològs an emesas divèrsas alèrtas qu’asseguravan que d’aigats coma lo de 1941 se poiriá tornar produire. A mai, lo 30 d’abril, una setmana abans la catastròfa, lo CEMADEN (Centre Nacional d’Alèrtas dels Desastres Naturals) avertiguèt del risc d’inondacion en Rio Grande do Sul.

E mai lo govèrn de Lula da Silva aja tanplan amendrits los fonzes de prevencion de catastròfas, ara a anonciat qu’investiriá 331 milions de dolars en nòvas accions de prevencion de catastròfas. Es tròp tard per Rio Grande do Sul mas almens se poirà prevenir de desastres futurs. Totun, la societat civila e las divèrsas associacions critican durament la gestion del govèrn.

De cercaires brasilièrs publiquèron arunan dins la revista Atmosphere un estudi suls patrons atmosferics que precedisson de desastres environamentals dins lo sud del Brasil, en revelant que lo cambiament climatic intensifica d’eveniments meteorologics extrèms. Critican que l’urbanizacion insostenibla e la gestion politica e economica deficienta, agreujadas per l’especulacion immobilièra e la desforestacion, son las vertadièras causas d’aqueles desastres, non pas la pluèja. Lo governador Eduardo Leite modifiquèt de nòrmas environamentalas en 2019 en favorissent d’interèsses financièrs sens far de consultas publicas, e aital a perennizat un modèl insostenible.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Legeire Boronhan
2.

Car legeire romegaire, Jornalet es una gaseta participativa, pas Le Monde o Le Figaro. Se siás pas content, as doas solucions : lor mandes d'argent cada mes per que pòscan dignament far lor trabalh o ben l'escrives tu l'article sus Gaudin. Amistosament tieu.

  • 9
  • 2
romegaire
1.

...e dus jorns après, encara res sus Gaudin. 
Brasiu e Netanyahu an dret a vint linhas sus la soa situacion... Per contre una demistificacion de Gaudin que la premsa francesa es a héser passar com un eròi panholesc shens jamei parlar dau son balanç o quitament shens biogràfia seriosa... e non, pas a Jornalet tanpauc !

  • 3
  • 4

Escriu un comentari sus aqueste article