Bandièra01 capçalera  1180x150: Botiga

Actualitats

crotz-tolosaCreated with Sketch.GasconhaBearnPalés

Mobilizacion a Pau per l’aplicacion efectiva de la Lei Molac

Malgrat lo sosten de cònsols màgers, de familhas e de la societat civila, e en despièch dels mejans per qu’aquò siá posible, la DSDEN nèga la dobertura de quatre nòvas classas bilinguas dins lo departament dels Pirinèus Atlantics

Mobilizacion a Pau per l’aplicacion efectiva de la Lei Molac
Mobilizacion a Pau per l’aplicacion efectiva de la Lei Molac

Tèxte legit

Lo 23 de mai passat, una quarantena de manifestants s'amassèron davant l’Inspeccion d’Acadèmia (ara dicha DSDEN) de Pau per protestar contra lo refús administratiu de dobrir de nòvas classas bilinguas a la rintrada de 2024 dins lo departament dels Pirinèus Atlantics. Malgrat l’adopcion de la Lei Molac lo 8 d’abril de 2021, qu’a per mira de promòure las lengas autoctònas dichas regionalas, los projèctes de dobertura de quatre classas bilinguas son blocats per la Direccion dels Servicis Departamentals de l’Educacion Nacionala (DSDEN). D’efièch, dempuèi l’adopcion de la lei fa ja tres ans, los blocatges a son aplicacion se son mostrats constants sus tot lo territòri francés, coma o avèm raportat dins Jornalet.

La Lei Molac, especificament son article 7, permet una generalizacion de l’ensenhament de l’occitan. Pasmens, malgrat que la demanda sociala siá fòrta e que totes los mejans sián en plaça, cap de nòva escòla bilingua es pas prevista per la rintrada venenta, en contradiccion amb la convencion que prevei la dobertura d’almens una escòla per departament e per an.

La plataforma Endavant denóncia çò que considèra coma un “blocatge injustificable” e crida a una mobilizacion generala. Lo succès recent de La Passem a demostrat l’interès e lo sosten massís de la populacion per aquela causa. Malgrat aquò, l’Educacion Nacionala francesa sembla de demorar sorda a las revendicacions localas.

Los manifestants, provesits de caçairòlas e de divèrses objèctes metallics, faguèron ausir divendres passat lor malcontentament per una caçairolada davant la DSDEN, ancianament Inspeccion d’Acadèmia. Espèran qu’aquel bruch arribarà a las aurelhas dels responsables e los empenherà a revisar lor posicion. Endavant exòrta los elegits locals de se jónher a aquela lucha per obtenir una politica lingüistica respectuosa de l’occitan e confòrma a las aspiracions dels ciutadans.

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article