Miramont de Guiana aculhiguèt dimars 28 de mai una amassada especiala de 300 escolans, de l’educacion bilingua e de l'ensenhament segondari que seguisson l’opcion d’occitan, sortits dels establiments del departament d’Òlt e Garona. L’eveniment, conegut coma “Las Maiadas”, a virat ongan sul tèma “Las femnas d’òc”.

Pendent la jornada, los participants aguèron l'astre de conéisser la poetessa Paulina Kamakine, tanben chafrada “Petit Ausèth”. L'amassada foguèt animada amb las danças del grop Tastets, e mangèron totes amassa dins lo collègi Didier Lamoli.

Delà las activitats ludicas, los escolans participèron a divèrses obradors organizats per las associacions ATP, EOE, Culturas d'Òc, Òc-Bi, demest d’autras. A mai, escambièron lors experiéncias en suscitant la coesion e la coneissença mutualas.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…