Bandièra01 capçalera  1180x150: Botiga

Actualitats

La Corèa del Nòrd manda d’escobilhas al Sud e lo Sud envia de K-Pop al Nòrd

D’activistas sud-coreans an mandat a la Corèa del Nòrd pendent d’annadas de balons cargats de messatges e d’articles divèrses

| BFM News

Tèxte legit

Fa gaire, la Corèa del Sud recebèt una molonada de balons plens d’escobilhas de la Corèa del Nòrd. De lor caire, un grop d’activistas del sud envièron dijòus passats dètz grands balons cargats de claus USB plenas de musica K-Pòp e tròt e de la populara sèria televisada WinterSonata. Los balons contenián tanben tant 200 000 papierons que criticavan lo cap nòrd-corean Gim Jeongeun (Kim Jong Un), coma 2000 bilhets d’1 dolar estatsunidenc, çò rapòrta The Washington Post.

Los activistas del sud fan partida del grop FFNK (sigla coreana per "Luchaires per una Corèa del Nòrd Liura"), qu’es comandat pel desertor nòrd-corean Bak Sanghak (Park Sang-hak). Dins un comunicat, l’FFNK acusèt la Corèa del Nòrd de “daissar tombar indiscriminadament” quinze tonas de curum al Sud mejançant de balons, çò que qualifiquèon de “mòstra d’insulte e de vergonha pels cinquanta milions de ciutadans” de la Corèa del Sud. L’armada sud-coreana condemnèt aquela accion coma una “violacion clara del drech internacional” que “menaça seriosament la seguretat” dels ciutadans.

Los activistas sud-coreans an mandat pendent d’annadas a la Corèa del Nòrd de balons cargats de messatges e d’articles divèrses per tal d’aténher la populacion del Nòrd. Aquela practica foguèt temporàriament enebida per Seol, mas la lei foguèt abrogada arunan. “Los envièrem de vertats e de faches, d’amor e de medecina –e de dolars en bilhets, de telesèrias e de cançons de tròt–”, çò ditz un comunicat de l’FFNK.

Se crei que la cultura del K-Pop de la Corèa del Sud pòt avèr un efièch subversiu dins la populacion del Nòrd coma lo que poguèt aver lo jazz dins l’Union Sovietica. De tot biais, lo consum de mèdias estrangièrs es considerat coma un delicte en Corèa del Nòrd. De fach, en 2020 s’aprovèt una lei especifica per censurar lo K-pòp e d’autres contenguts sud-coreans.

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitèas
2.

Euròpa manda sas bordilhas en Africa. E pas amb de balonets mas amb de navirasses plan plens.

  • 1
  • 0
Pascau
1.

Ah... Tà jo l'informacion importanta qu'ei meilèu las manifestacions pertot en França contra l'extrema dreta... Mes ok.

Qu'èi lejut çò qui'n disè France Info aqueste matin e qu'èi avut l'impression que minimizavan drin la participacion deu monde...

A Tolosa qu'èi avut l'impression qu'èram pla numeros.a.s e qu'an balhat ua estimacion hèra esloisha (mantuns milièrs...)

Ne m'a pas semblat i véder hèra de jornalistas dens aqueras protèstas... Mes n'ac èi pas tot vist.

  • 5
  • 4

Escriu un comentari sus aqueste article