Lo president de Polonha, Andrzej Duda, a mes son vèto a una lei aprovada pel parlament de son país que reconeissiá oficialament lo silesian coma lenga. Aquela reconeissença auriá aumentat la proteccion de la lenga e los dreches lingüistics de sos locutors. Duda assegura que “l’opinion dominanta” demest “los expèrts” seriá que lo silesian es tot simplament un dialècte del polonés.

La lei que reconeissiá lo silesian foguèt aprovada lo 26 d’abril al Sejm, la cambra bassa del parlament polonés, amb lo sosten de partits del centredrecha fins a l’esquèrra mas l’oposicion dels partits de drecha e d’extrèma drecha. Duda arribèt a la presidéncia de Polonha coma candidat del partit ultraconservator Lei e Justícia (PiS, segon sa sigla en polonés), una de las formacions opausadas a la lei.

Monika Rosa, deputada silesiana d’un dels partits centristas que sostenguèron la nòrma, a anonciat que la lei se tornariá presentar al parlament un còp que Duda auriá quitat d’èsser president e doncas auriá pas pus drech de metre son vèto. L’eleccion presidenciala es prevista per 2025.

Segon lo recensament de 2021, lo silesian es parlat per aperaquí 460 000 personas en Polonha. La lei prevesiá l’inclusion de la lenga dins lo percors escolar e son usatge dins l’administracion municipala.

Aquesta nòva es adaptada de Nationalia amb qui Jornalet ten un acòrdi de cooperacion.