Bandièra01 capçalera  1180x150: Novestivada

Actualitats

Los Republicans an destituit Ciotti per aver decidida una coalicion amb Le Pen

Per ara, vòl pas partir mas es isolat demest los dirigents de son partit

Per ara, Ciotti vòl pas partir e assegura qu’es e rèsta lo president de la formacion politica en soslinhant que l’elegiguèron los aderents
Per ara, Ciotti vòl pas partir e assegura qu’es e rèsta lo president de la formacion politica en soslinhant que l’elegiguèron los aderents | Partit Popular Europèu

Tèxte legit

Lo partit conservator francés dich Los Republicans a destituit son president, lo niçard Éric Ciotti, après que dimars assegurèt d’èsser arribat a un acòrdi amb lo Recampament Nacional, lo partit de Marine Le Pen, fàcia a las eleccions legislativas anticipadas.

La decision de destituir Ciotti l’a presa a l’unanimitat lo burèu executiu del partit en assegurant que lo pache amb l'extrèma drecha “romp entièrament amb los estatuts e la linha dels Republicans”. Aquela decision marca un ponch d'inflexion en la politica intèrna del partit, qu’a ensajat de manténer una postura ferma contra la collaboracion amb l'extrèma drecha, malgrat una proximitat ideologica consecutiva a l’evolucion del macronisme devèrs la drecha dura, especialament sus las questions migratòrias o tanben a respècte del tractament dels LGBTQ+.

Per ara, Ciotti vòl pas partir. Dins un messatge publicat suls rets socials a assegurat que sa destitucion èra una “violacion flagranta” dels estatuts del partit e a menaçat de “consequéncias penalas”. A mai, lo deputat occitan assegura qu’es e rèsta lo president de la formacion politica en soslinhant que l’elegiguèron los aderents.

 

Un Front Popular e de manifestacions contra la possibla arribada de l’RN al poder

 

Mentretant, lo president francés, Emmanuel Macron, apareguèt ièr publicament pel primèr còp après la revirada electorala de dimenge passat. Macron afortiguèt que pensava pas d’autrejar las claus del poder als neofaissistas menats per Marine Le Pen. De lor caire, los partits d’esquèrra franceses se vòlon unir en un Front Popular, segon la formula del deputat de La França Insomesa, lo picard François Ruffin, e s’organiza de manifestacions per carrièras per tal de mobilizar los electors contra la possibla arribada dels ultranacionalistas reaccionaris de l’RN als poders legislatiu e executiu.

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lachaud
1.

Lo partit de Marine Le Pen es fasciste. L'esquerra apela a votar contre los extremes.
Creisetz pas qu'aqueus eslogans son depassats?
Laissam lo passat de dreicha e d'esquerra darrier nos.
Chau inventar una autra politica. La societat d'uei es pas aquela d'aier. La crisa economica e financiera es aqui, la classa obriera a aura lo bac, veire bac +2. I a crisa tòca las elitas scientificas, religiosas, la medecina.
Dempuei Mitterand, l'esquerra avia la possibilitat de far una politica d'esquerra e non pas segre lo partit de l'argent. Creise pas mai a la politica de la dreicha o de Bardella qua d'aquela d'esquerra o daus ecologistes.
Tots los discors politics son a tornar far.

  • 2
  • 3

Escriu un comentari sus aqueste article