Bandièra01 capçalera  1180x150: Novestivada

Actualitats

L’IA es dangierosa

Los expèrts avertisson qu’aquela menaça de l’IA es a plusors nivèls, del militar fins al social

L’IA es dangierosa
L’IA es dangierosa

I a de mai en mai de scientifics que vòlon avisar que l’IA (Intelligéncia Artificiala) poiriá provocar l’extincion de tota l’umanitat. Fins ara ja o avián avertit mai d’un còp. Ara 25 cercaires an publicat amassa un document ont es denonciat lo dangièr del desvolopament dels IA en demandant d’agir tre ara per salvar nòstra espècia. L’escrich es publicat dins lo numeric Science, e entre los que l’an signat i a plusors prèmis Nobel.

Per ansin, qualques unes dels scientifics mai celèbres e tanben pus importants de la planeta an signat amassa un document ont avisan dels dangièrs del desvolopament de l’IA. Dins lo document los cercaires avertisson que desvolopar aquela tecnologia poiriá provocar l’extincion entièra de l’umanitat.

“De desvolopar aquela tecnologia pòt crear un tipe de tecnologia que n’avèm pas encara tot lo contraròtle, e aquò poiriá menar a la pèrda de milions de vidas umanas o encara de la biosfèra e, fin finala, a l’extincion de nòstra espècia”, çò dison los cercaires dins lo document.

A mai, los cercaires prevenon que “ja pòdon èsser creats de sistèmas d’IA plan dangieroses que son plus complèxes que la capacitat umana de los arrestar, e per ansin pòdon realizar un contraròtle de fòrça domenis e d’un biais critic”, çò apondon. E sonque per aquela rason ja demandan un acòrdi general mondial per assajar de regular la tecnologia de l’IA. Un acòrdi qu’encara existís pas.

Segon aqueles cercaires, i a pas cap de biais actual d’avisar l’umanitat dels dangièrs d’aquela tecnologia e se se’n fa un marrit usatge, se poiriá pas arrestar pr’amor que los scientifics, d’un biais general, contraròtlan pas las IA, que son de sistèmas autonòms.

“Es possible que lèu arribe lo jorn, çò dison los expèrts, que l’IA assajarà d’aténher de tòcas pas brica bonas per l’umanitat, e alara los umans poirem pas ni l’arrestar ni mai la contrarotlar”.  Per exemple, se poiriá que l’IA ganhèsse d’en primièr la fisança dels umans e puèi assagèsse d’aver tot lo material necessari per poder puèi dire d’un biais indirècte als umans poderoses cossí far.

 

Una menaça a mai d’un nivèl

 

Aital, los expèrts avertisson qu’aquela menaça de l’IA es a plusors nivèls, del militar fins al social. Prepausan doncas als govèrns mondials de crear d’organismes per agir rapidament dins lo contraròtle de l’IA. Tanben demandan mai de lum e mai d’informacion a las entrepresas que crèan d’IA pr’amor que fins ara es malaisit de saber cossí aquestas foncionan.

D’autre caire, los cercaires tanben exigisson mai de leis e mai d’informacion sus l’IA en tot aconselhar, per prevenir lo risc que las entrepresas pòscan desvolopar aquel tipe de tecnologia, qu’aquesta siá d’accès liure e public, coma o fa OpenAI. Mas OpenAI tanben a mes fin al departament qu’analisava lo risc de l’IA. (Legissètz la seguida).

 

 

 


Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

D'un biais plan mai general encara, IA o non IA, l'economia deu servir l'umanitat. L'umanitat non a de ges de biais l'obligacion de servir l'economia. L'economia deu èsser e demorar rigorosament contrarotlada pels elegits democratics dels pòbles — e supausar, çò que non pensi — que los pòbles ajan besonh d'elegits representatius per se dirigirr eles-meteisses.

Or, actualament, aqueste contraròtle es vengut polticiament impossible, e la democracia n'es donc a se morir, amb o sense IA… Non podèm continuar aital.

  • 2
  • 0
Pitèas
1.

I a bèl brieu que la tecnologia la controtlam pas. Quand se pretend que la tecnologia es al servici de l'òme, es de podra d'embòrnia. I a totjorn de bonas rasons de desvolopar las tecnologia. En començant per la santat. Al cap del camin òm se maina que mai que mai se tracha de far de dardenas sus l'esquina del vulgum pecus. I a pas que de veire los laboratòris e las companhiás farmaceuticas.
O cal dire fòrt e mòrt: la tecnologia, es l'òme qu'es a son servici.
Per pas dire d'èsser sistematicament contra tot cal nuançar: a cada novèla invencion se caldriá pausar las questions:
1. de sa nocivitat;
2. de son utilitat.
Un còp lançat, es gaireben impossible de controtlar lo joguet. Veire la temptativa quimerica de voler ara enebir lo telefonet als dròlles de mens de 11 ans. Ara que son drogats a tiktok e autres dracs de la propaganda.

  • 4
  • 0

Escriu un comentari sus aqueste article