Bandièra01 1180x150: Comuna de Tolosa

Actualitats

Reünion entre l’OTAN e lo govèrn escocés per tractar l’adesion d’Escòcia a l’organisme en cas d’independéncia

La reünion aguèt luòc lo mes passat a Brussèlas. Las armas nuclearas que lo Reialme Unit fabrica en territòri escocés son lo principal escuèlh

De representants del govèrn escocés se reüniguèron lo mes passat amb de representants de l’OTAN a Brussèlas per tractar l’incorporacion d’Escòcia dins l’organisme en cas d’independéncia. Segon çò qu’avança la BBC, de nauts foncionaris del govèrn escocés se reüniguèron amb Dirk Brengalmann, qu’èra alavetz secretari general adjonch de l’OTAN per las Questions Politicas e la Politica de Seguretat.
 
De representants de la delegacion del Reialme Unit a l’OTAN facilitèron lo rescontre e tanben i assistiguèron. Segon de fonts de l’OTAN, Escòcia aguèt l’oportunitat d’argüir que, puèi qu’es uèi lo jorn una partida del Reialme Unit, estat que ja fa partida de l’organisme internacional, seriá pas necessari de far una demanda d’adesion formala partent de zèro per s’i incorporar. Cal recordar que lo Partit Nacional Escocés (SNP), que govèrna en Escòcia, prenguèt l’engatjament de far aderir l’estat novèl a l’OTAN. Un foncionari de l’OTAN qualifiquèt lo rescontre coma “informal e informatiu”.

 
La fabricacion d’armas nuclearas, solet escuèlh

Ça que la l’SNP tanben s’engatgèt a illegalizar la fabricacion d’armas nuclearas que lo Reialme Unit organiza en territòri escocés. E aquel ponch sembla d’èsser lo solet escuèlh en la negociacion, car per l’OTAN l’investigacion e la fabricacion d’armas nuclearas son un ponch important. 

Lord Robertson, èx-secretari general de l’OTAN e un secretari de la Defensa dins lo govèrn laborista de Tony Blair, diguèt que cresiá que lo futur de las armas nuclearas èra important per l’organizacion e que, per tant, aquò podiá èsser una question decisiva.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L'Avana
1.

Pas tant lèu independents que ja ja plan dependents !

  • 2
  • 0

Escriu un comentari sus aqueste article