Bandièra01 1180x150: Comuna de Tolosa

Actualitats

Lo CD novèl de Muriel Batbie Castell

Après son album Canta a Capella, Muriel Batbie Castell, cantaira coneguda per la puretat de sa votz e la diversitat de sos repertòris, contunha aqueste còp dins la dralha de la confidéncia amb un single de tres títols, Ars Intima (en latin, una expression que significa “çò secret dins l’art”).


La votz sola, sens masqueta, es un exercici dificil, exigent, qu’aquela artista fòra tendéncia nos prepausa amb precision e sensibilitat.
 
Dins aquel CD novèl, Muriel Batbie Castell s’acompanha ela meteissa al piano (un retorn al seu primièr instrument) amb una composicion sul poèma de Loïsa Paulin: Silenci de l’auton, una canta en francés de la poetessa bèlga e israeliana Esther Granek, e lo mistic Cantar del alma de Frederic Mompou. Aqueles tèxtes pregonds, ligats a l’anma, en tres lengas latinas, menèron naturalament Muriel Batbie Castell a trobar lo títol Ars Intima.
 
 
L’actualitat de la cantaira es plan cargada e diversificada. Cal senhalar primièr la distincion que recebèt recentament amb la Ròsa d’Argent, primièr prèmi de la cançon poetica de creacion decernit per l’Acadèmia dels Jòcs Florals amb la canta Alba de Luna (que se pòt escotar sul seu sit).
 
Tanben, la tornarem trobar lèu en concèrt amb l’inauguracion de la sason novèla dels Dijòus de l’Ostal d’Occitània lo 19 de setembre, amb una creacion Vents del Nòrd, Vents del Sud que farà amb lo compositor e guitarrista jazz Gilbert Isbin, vengut especialament de Brujas per l’escasença, e tanben amb la contaira Monica Burg e puèi en novembre, encara a Tolosa, cantarà al costat del cantaire e compositor barcelonés Enric Hernàez e de la jove artista aranesa Alidé Sans per un espectacle Ai Espiat Coma Brilhavan las Montanhas. Sens comptar son retorn a l’interpretacion dels trobadors amb lo jogaire de laüt arabi Lakhdar Hanou, autre moment fòrt previst a la fin de setembre.
 
Encara en setembre, se poirà ausir tanben sa votz amb la sortida d’un filme de Jean Périssé consacrat a Pèire-Pau Riquet amb l’actor francés Bernard Le Coq. Lo realizaire causiguèt Ieu n’Aime una Bruneta, una canta barròca occitana que la cantaira gravèt dins lo CD Canta a Capella. Finalament, l’auton non serà silenciós per Muriel!
 
“Ont se’n va quèrre aquela fòrça d’amna? Pr’amor que s’agís pas sonque d’una virtuositat vocala, mas d’umanitat tota que balha a cada cant sa personalitat pròpria.” (C. Saint-Paul)
 
“La votz es sedosa, l’articulacion naturala, linda, la linha melodica, aerenca coma un cant d’aucèl. Las inflexions de la cantaira son d’una feminitat requista. Votz tresviranta, jòc sens res que pesa, preséncia misteriosa, de gràcia tota e de retenguda, es aquí l’art bèl de Muriel Batbie Castell.” (C.Belcikowski)
 
 
 
 
 
Cheleg Bergmann

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pimflòid
2.

Vivant!

Be hè gai d'aver informacions culturalas suu jornalet!!!

Sustot d'aquestas! Mercés per l'anóncia !

Que corri crompar lo disc!

  • 1
  • 0

Escriu un comentari sus aqueste article