Dempuèi 1974, l’EOE es una institucion occitana al còr de l’estiu. Milanta personas passèron a Picapol, puèi, e fins ara, al licèu de l’Ostal de Vilanuèva d’Òut (Naut Agenés) per aprene la lenga d’òc. Ongan se farà encara al licèu privat L’Ostal de Vilanuèva. Ara fa gaireben un quinzenat d’annadas que se fa ailà, e es una abitud bona perque l’organizacion es perfièita çò qu’es pas totjorn lo cas dins l’occitanisme.
 
L’EOE se farà del dimenge 18 al 24 d’agost amb de corses de gascon, lemosin e lengadocian prepausats. Los estagiaris, al delà de la causida dialectala, pòdon causir de corses intensius (6 oras per jorn) o normals (2 oras per jorn). I a encara l’Escoleta pels de mens d’onze ans e l’Escòl’Ado, que coneisson un succès renovelat cada an. De passejadas, de talhièrs e de conferéncias en occitan completan una ofèrta rica.
 
E òc, l’EOE creis encara un pauc ongan e la rason es dins l’organizacion seriosa e la multiplicitat de las activitats prepausadas. Aprèp una baissa dels efectius deguda a la crisi, especialament pel nombre de catalans que demeniguèt fòrça, l’EOE aurà mai d’estudiants en 2013. Las velhadas tradicionalas coma las del conte, o dels estagiairis, i seràn. I aurà tanben un bal amb lo grop Fai Deli, la serada del dimars 20. De notar lo dimècres 21 d’agost, la represa —30 ans aprèp!— de la famosa pèça La Patacada amb 22 comedians a la sala de las fèstas de La Ròca Timbaut. L’EOE s’acabarà amb la tradicionala fèsta del divendres sus la plaça La Faieta de Vilanuèva, amb un sopar e de musica. Aquel 23 d’agost, a partir de 19h30, seràn la jove aranesa Alidé Sans, que manca pas de talent, e la balòcha de Guilhèm López que clavaràn aquela edicion de l’EOE.
 
 
 
 
Nicolau Rei Bèthvéder