Bandièra01 1180x150: Comuna de Tolosa

Actualitats

Los banhaires d’una plaja de Sicília an fach una cadena umana per secórrer 164 immigrants

164 immigrants, la majoritat d’origina siriana, amb fòrça enfants, foguèron ajudats divendres passat pels banhaires qu’èran a la plaja, quand la barca que los menava arribava a la plaja de Morghello, près de Siracusa. Las gents que gaudissián de la plaja esitèron pas a sautar dins la mar quand vegèron la barca, e formèron sul pic una cadena umana per secórrer los migrants. Aquel fach se publiquèt dins las primièras paginas dels jornals italians.
 
La Gàrdia Litorala italiana enregistrèt un vidèo ont se pòt observar çò que se passèt. Las personas qu’èran sus la plaja en aquel moment intrèron sul pic dins la mar, e mai s’èran abilhadas, e acompanhèron los immigrants fins a la riba.
 
Lo president de la Republica Italiana, Giorgio Napolitano, se mostrèt impressionat: “Los imatges dels banhaires qu’intrèron generosament dins la mar per ajudar los immigrants fan onor a Itàlia. Mòstran que la solidaritat preval”, çò declarèt.
 
Mai de 9000 immigrants son arribats dins lo darrièr mes e mièg en Itàlia, dont la majoritat per de causas de conflicte o de pauretat. Normalament venon de Siria, Eritrèa, Somalia o Mali. Dijòus passat la Gàrdia Litorala secorreguèt 300 personas en la còsta siciliana.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

pèire cardenal
1.

per que la solidaritat siegue totala e encara pus eroïca, serià ben qu'aquelei banhaires prenguèsson cadun en carga una d'aquelei familhas e leis alotjèsson e lei noiriguèsson dins seis ostaus particuliers ! que'ansin se sariàn molhats dos cops, lo primier literalament e lo segond metaforicament ! aquo sarià pus bèu que de l'antica ! lo roman de jean Raspalh " le navire deis saints" se fai realitat

  • 0
  • 0

Escriu un comentari sus aqueste article