Un òme de 42 ans es mòrt e un jove de 20 ans es ferit e espitalizat a Albi: es lo resultat d’una batèsta mortala que se debanèt divendres passat dins l’encastre e las fèstas de Sant Privat a Carmauç (Segalar).
Tot comencèt quand un grop de joves s’installèron a la terrassa d’un restaurant après mièjanuèch e comencèron de far de rambalh. Que s’acabèt en còps, entre los joves d’un costat e lo gerent del restaurant amb son emplegat de l’autre costat. Lo gerent se seriá servit d’un cotèl de cosina que provoquèt la mòrt e la ferida.
La victima, Franck Durand, èra un estatjant de Carmauç qu’anèt a las fèstas en familha. Son filh foguèt ferit e el tuat quand ensagèt de protegir son filh, çò explicava lo conhat de la victima a La Dépêche.
Los dos autors presumits son en gàrdia a vista. La polícia departamentala, la prefectura, l’amicala dels comerçants de Carmauç e lo cònsol an decidit de refortir la seguretat en vila e de suprimir lo darrièr jorn de las fèstas en respècte a las victimas.
Durand èra soudaire a la Companhiá Europèa de Cartonatge de Sant Beneset de Carmauç, se maridèt lo mes passat amb la maire de son darrièr enfant, una petita filha de 6 ans. Èra tanben paire de 2 dròlles d’11 e 20 ans.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
"Se maridèt lo mes passat amb la maire de son darrièr enfant": quina tristesa ... Coneissi aquela fèsta e jamai auriái pas pensat que poguèsse arribar un jorn. D'istorietas merdicosas atal, me pensavi qu'èra sonque per las vilassas. Me soi enganat.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari