Bandièra01 1180x150: Comuna de Tolosa

Actualitats

Los ensenhaires d’occitan recebuts al Ministèri de l’Educacion

La delegacion èra pensada per recubrir l’ensems del sistèma educatiu, de la mairala al superior, amb Martina Ralu, Sandre Arnaud, Maria-Joana Verny, e Felip Martèl
La delegacion èra pensada per recubrir l’ensems del sistèma educatiu, de la mairala al superior, amb Martina Ralu, Sandre Arnaud, Maria-Joana Verny, e Felip Martèl | FELCO

Tèxte legit

Una delegacion d’ensenhaires occitans foguèt recebuda diluns passat al Ministèri de l’Educacion estatala francesa. La delegacion de la Federacion dels Ensenhaires de Lenga e Cultura d’Òc (FÈLCO) parlèt un pauc mai d’una ora amb Jean-François Plard, qu’es l’encargat ministerial de las relacions europèas e internacionalas, de l’ensenhament a l’estrange e de las lengas mal nomenadas regionalas, a qui presentèron un dorsièr de 50 paginas “en esperant que serà legit”.
 
Segon la FÈLCO, la discussion se debanèt “dins un clima franc e tranquil”; considèran plan positiu d’aver pogut parlar al ministèri, e mai s’“una experiéncia longa nos convida a esperar de veire çò que serà fach de concret”.
 
Las revendicacions presentadas al ministèri foguèron mai d’una, dont cal soslinhar la creissença dels pòstes als concorses, mai que mai al CAPES, e lo melhorament de l’informacion a las familhas e als decididors de l’Educacion Estatala sus plaça. Tanben demandèron l'engatjament de l'Estat amb las regions, e sustot de velhar a l’aplicacion de las convencions ja signadas dins aquel sens.
 
Al delà de tot aquò, los ensenhaires insistiguèron que cal resòlver la manca de continuitat pels escolans qu’an començat l’occitan en primari e que pòdon pas contunhar en collègi e licèu. E tractèron lo desvolopament de l’ensenhament universitari dins las acadèmias ont existís pas.
 
Los ensenhaires tanben saludèron “l’adopcion de la lei d’orientacion e la plaça que fa a las lengas de França, en ramentant qu’aviá calgut batalhar per aquò”.
 
Dos dels representants èra originaris d’Auvèrnhe, ont l’acadèmia de Clarmont-Ferrand es una de las acadèmias sinistradas que n'es estat question pendent l'entrevista.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Sarà Laurens Marselha
34.

Òsca la Felco ! Nautres en Provença siam amenaçats per lei enfadats dau separatisme de la lenga d'oc. La Felco es una de nostrei darrierei proteccions ambe l'AELOC, nostra branca de la Felco. Tant piegès per vos se vos agrada pas.

  • 3
  • 0
ALIBERT
33.

Vesi pas brica l'interés que d'unes troban a criticar un trabalh de terren vertadièr. Es nòstre solet biais de subreviure...

  • 7
  • 0
Maria Joana Verny Montpelhièr
32.

a "31 / Justiça de patz"... "Rèsta pas ren a faire per leis autrei!" !!!!!
E ben !!!!! Ne volètz de causas de faire ? Basta de demandar ! Avèm besonh de totes, e mai de vos ? Quinas proposicions (onèstas !) avètz de faire ?
"Tot lo monde saup ben que VOS FASÈTZ TOT." !
Sai que non ! E sèm plan plaçats, del temps que fasèm, per vèire çò que caldria faire se i avia mai d'obrièrs e de soscaires que de bramaires o risolejaires...
Ten, puèi que vos recomandatz de la banana del Segalar (cf. https://www.facebook.com/labananadelsegalar?fref=ts), aqui una causa que fai avançar, l'imaginacion geniala de Detz TV ! Enfin d'umor fin, modèrne, que passa prèp d'un public larg. De causas aitalas, per mostrar en societat un occitan viu, modèrn, jove, intelligent, ne caldria maites.
Los ensenhaires, se nos embarram dins l'escòla sens pensar, amb d'autres, cossi lo faire dintrar / tornar en societat, ensenharem un occitan in vitro.
Vaqui perqué avèm besonh de maitas causas concrètas, e quand disi "concrètas", es pas exclusiu per ieu de la reflexion...
Ailàs, d'unes criticaires an mai de reflèxes que de reflexion...


  • 6
  • 0
Justiça de patz Bananariá del Segalar
31.

#25
"Que fan eles" ???


I a pas besonh de ren faire!

Tot lo monde saup ben que VOS FASÈTZ TOT.

Rèsta pas ren a faire per leis autrei!

  • 4
  • 7
Joan-Pèire de Niça
30.

Saludi lo travalh menat per la FELCO despi d'annadas embé d'autres organizacions coma l'IEO, Oc-bi, Calandretas. Avèm da besonh de toi per desvelopar la lenga e la cultura occitani.

  • 11
  • 0

Escriu un comentari sus aqueste article